د سوېلي پښتونخوا په چمن کې د سپین بولدک ـ چمن په دروازه د پاسپورټ او وېزې د جبري کېدو په غبرګون کې د پیل شوي پرلت پنځه میاشتې وشوې چې د پاکستان حکومت یې غوښتنې نه دي منلې. پرلتوال وايي، د ټرانسپورټ په وړاندې یې لاره هم خلاصه کړې خو بیا هم د حکومت دريځ پخوانی دی.
په چمن کې د پاکستان د حکومت د هغې پرېکړې په غبرګون کې پیل شوی پرلت پنځه میاشتې وړاندې پیل او لا هم روان دی.
د دغه پرلت ویاند عبدالصادق اڅکزی وايي، د پاکستان لنډمهالي حکومت لومړي وزیر انوارالحق کاکړ له لوري د چمن ـ سپین بولدک په لاره د پاسپورټ او وېزې تر جبري کېدو وروسته یې پرلت وهلی او د ده په خبره تر څو یې چې غوښتنې نه وي منل شوې پرلت به روان وي.
پنځه میاشتې وړاندې د پاکستان موقت حکومت پرېکړه وکړه چې له دې وروسته به پر ډیورنډ کرښه د سپین بولدک ـ چمن په دروازه تګ راتګ په پاسپورټ او وېزه ترسره کیږي چې پخوا تر دې پر دغه لاره تګ راتګ په پاکستاني شناختي کارډ او افغان پېژندپاڼه ترسره کېده.
له هغه وروسته د سوېلي پښتونخوا اوسېدونکو په چمن کې پرلت پیل کړ او له حکومت یې وغوښتل چې تګ راتګ دې د پخوا په څېر اسان کړي.
د دغه پرلت ویاند عبدالصادق اڅکزی وايي، حکومت دوه اوونۍ وړاندې ورته وويل چې پرلت دې پای ته ورسوي او د دوی غوښتنې دې ومنل شي، هغه وايي: «موږ، ځايي امنیتي ادارو او دیني عالمانو دوه اوونۍ وړاندې داسې فیصله وکړه چې موږ به د لسو ورځو لپاره پرلت ختموو او دوی به زموږ غوښنې مني چې په دغه لاره د پخوا په څېر تګ راتګ په شناختي کارډ او افغان تذکره ترسره کیږي، نو موږ لاره د ټرانسپورټ لپاره خلاصه کړه خو اوس حکومت چل کوي او زموږ غوښتنې یې لا نه دي منلې.»
هغه وايي، که حکومت ورسره په تازه شوې پرېکړه کې دوه ګونی چلند وغځوي دوی به بېرته دغه لاره وتړي او پرلت ته به دوام ورکړي.
د بلوچستان ایالت د اطلاعاتو پخوانی وزیر جان اڅکزی چې اوس پر دغې دنده هم نه دی وايي، چې حکومت پر خپل پخواني دريځ کلک دی او نوې پرېکړې نه مني.
خو په دې اړه لا د بلوچستان نویو ټاکل شویو چارواکو خپل دریځ نه دی روښانه کړی.
په ۲۰۲۳ کال کې پر ډیورنډ کرښه پرتې ټولې لارې وخت ناوخت د پاکستاني حکومت له لوري له خڼدونو سره مخ شوې او ډیری مهال ان د ټرانسپورټ او پلي تګ پر مخ په ورځو ورځو تړلې پاتې شوې دي.
د ناروغانو او بیړنیو چارو لپاره د پلي تګ راتګ لپاره هم وېزې حتمې شوې چې د یوې پاکستانۍ وېزې بیه ان تر څه باندې زرو امریکايي ډالرو پورې ورسېده چې ډیر لږ خلک د دومره لوړې بیې پرې کېدو وس لري او پاتې هغه یې له ګڼو ستونزه سره لاس او ګراېوان دي.
