د طالبانو دفاع وزیر ملا محمد یعقوب مجاهد او لوی درستیز فصیح الدین فطرت د قطر له امیر الشیخ تمیم بن حمد ال ثاني سره وکتل. د طالبانو ویاند ذبیح الله مجاهد وايي، دواړو لورو د دواړو هېوادونو ترمنځ د اړیکو په پیاوړتیا او په بېلابېلو برخو کې د پرمختګ په اړه خبرې اترې کړي دي.
ښاغلي مجاهد په خپل اېکس کې لیکلي، چې ملا محمد یعقوب د قطر له امیر څخه «د افغانستان د ازادۍ او د اشغال د ختمېدو په برخه کې ددغه هېواد له منځګړتوب مننه کړې.»
ذبیح الله مجاهد دغه راز د قطر د امیر له قوله لیکلي، چې نوموړي افغانستان دوست او ورور هېواد بللی دی.
په دې کتنه کې ښاغلي یعقوب د قطر امیر ته د دواړو هېوادونو ترمنځ د اړیکو د پراختیا ډاډ ورکړی دی.
د قطر د بهرنیو چارو وزارت بیا تراوسه په دې اړه څه نه دي ویلي.
د طالبانو دفاع وزیر ملا یعقوب مجاهد او لوی درستیز فصیح الدین فطرت د قطر له دفاعي چارواکو سره په دفاعي برخه کې د دوه اړخيزو همکاريو د پياوړتيا په موخه د کب په دیارلسمه دغه هېواد ته تللي و.
که څه هم قطر د نورې نړۍ د هېوادونو په څېر طالبان په رسمیت نه پیژني، خو دغه هېواد له طالبانو سره ډیپلوماټیکې اړیکې لري او د دغې ډلې سیاسي دفتر په دوحه کې فعال دی.
د کډوالو په چارو کې د ملګرو ملتونو عالي کمېشنرۍ (يو این ایچ سي ار) دفتر نن پنج شنبه د (کب ۱۷مه) په خپله ایکس پاڼه لیکلي چې دغه ښوونځی یې هغو ځوانو زدهکوونکو ته جوړ کړی چې له دې وړاندې یې په یوه کرايي کور کې له څوکیو او مېزونو پرته زدهکړې کولې.
دغه دفتر وايي، یاد ښوونځی په لمرېزه برېښنا سمبال دی، او له لومړنیو اسانیاو برخمن دی، چې په دې سره به د زدهکړو بهیر په دغې سیمه کې وغوړيږي او د دې چارې مثبتې پایلې به څرګندې شي.
د کندهار لپاره د طالبانو د اطلاعاتو او کلتور ریاست مشر د دغې ډلې تر واک لاندې ملي ټلویزیون ته ویلي، چې د کندهار ښار د مرکز په نهمه ناحیه کې د ۳۱۷زره ډالرو په لګښت د یوه ښوونځي د ودانۍ جوړولو چارې بشپړې او ګټې اخیستنې ته سپارل شوی.
د دغه ریاست چارواکو زیاته کړې چې په ۱۶ درسي ټولګیو کې ۱۱۰۰ زدهکوونکو ته د زدهکړو زمینه برابره شوې.
د کندهار ځايي طالب چارواکي وايي یاد ښوونځی د نهو میاشتو په موده کې جوړ شوی، چې د ۱۶ درسي خونو په لرلو سره به په کې دوه وخته ۱۱۰۰ نجونې او هلکان زده کړې کوي.
د دغه ښوونځي د جوړولو او پرانیستې خبر داسې مهال ورکول کیږي چې په افغانستان کې واک ته د طالبانو له رسېدو وروسته له شپږم ټولګي پورته د نجونو پر زدهکړو د بندیز ۹۰۰ ورځې پوره شوې او دغه ډله وايي چې تر شپږم ټولګي پورته یې د نجونو پر زدهکړو ځکه بندیز لګولی چې د دوی لپاره د زدهکړو نوې تګلاره جوړوي خو دغه تګلاره د ۹۰۰ ورځو په تېرېدو لا هم نه ده بشپړه شوې.
