د ملي مقاومت جبهې د دوشنبې په ماښام خبر ورکړی چې د کابل ښار د ۱۷مې امنیتي حوزې په مربوطاتو کې یې د طالبانو پر یوه پوسته برید کړی چې په پایله کې یې یو طالب وژل شوی او د دغې ډلې دوه نور وسله وال ټپیان شوي دي.
دغه جبهه وايي، چې په دې برید کې یې ځواکونو ته کوم زيان نه دى اوښتى.
د مقاومت جبهې په اېکس خواله رسنۍ خپره کړې خبرپاڼه کې لیکلي، چې د طالبانو پر ضد به خپلو بریدونو ته دوام ورکړي.
طالبانو تر اوسه د دغې برید په اړه څه نه دي ویلي.
د طالبانو د سترې محکمې مشر عبدالحکيم حقاني د دوشنبې په ورځ د روژې مياشتې د مبارکۍ په يوه پيغام کې له خلکو غوښتي، چې روژه د«تېرو اعمالو د توبې او نفس د اصلاح» لپاره تر ټولو ښه فرصت دی.
حقاني ويلي، چې د "امريکایي ۲۰ کلن اشغال" پر وړاندې د دوی د ډلې غړو قربانۍ ورکړي او دا مهال يې هېواد په امن کې دی.
نوموړي له خپلې ادارې، سوداګرو او شتمنو کسانو څخه غوښتنه کړې، چې د هغو وژل شويو کسانو له کورنيو سره همکاري وکړي، چې په تېرو شلو کلونو کې قرباني شوي دي.
هغه زياتوي: « ټول شتمن هېوادوال که په هېواد کې وي او یا بهر د روژې په دې مبارکه مياشت کې دې بې وزله افغانان، د شهیدانو کورنۍ او اولادونه نه هېروي او کومک دې ورسره وکړي.»
د طالبانو قاضي القضات د مبارکۍ په دې پيغام کې له مسلمانانو غوښتي، چې د فلسطين له خلکو سره مرسته او همکاري وکړي؛ څو د ده په خبره د «اسراييل له وحشته» خلاص شي.
د طالبانو رییس الوزرا ملا محمد حسن هم نن دوشنبه د روژې میاشتې په مناسبت په پیغام کې ویلي، چې غزه اوس مهال د اسراییل له «سخت ظلم او وحشت سره مخ ده او هغه څه چې په غزه کې روان دي د تاریخ د بشریت پر مخ تور داغ» دی.
