اصف علي زرداري چې تېره شنبه د پاکستان د ولسمشر په توګه وټاکل شو، پرېکړه کړې چې د دغه هېواد د ناسم اقتصادي وضعیت له امله به تنخا نه اخلي. د پاکستان د ولسمشرۍ ماڼۍ په خبرپاڼه کې راغلي، چې د زرداري د دې پرېکړې موخه په هېواد کې د مالي مدیریت هڅونه ده.
د خبرپاڼې له مخې، اصف علي زرداري ویلي چې نه غواړي د پاکستان پر ملي خزانې بار واچوي.
نوموړی دا پرېکړه په داسې حال کې کوي، چې تېر کال د دې هېواد ولسمشر عارف علوي د پاکستان اقتصادي شرایطو ته په کتو سره بیا هم د خپل معاش د زیاتوالي غوښتنه کړې وه.
اصف علي زرداري چې له ۲۰۰۸ تر ۲۰۱۳ کاله هم د پاکستان ولسمشر و، په ۲۰۱۹ کال کې د اختلاس، فساد او پیسو مینځلو په جرم ونیول شو.
د راپورونو له مخې، زرداري په ځلونو د فساد په تور نیول شوی دی.
په پاکستان کې له روانو سیاسي ناندریو سره د دغه هېواد اقتصادي وضعیت هم د پام وړ خراب شوی دی او په وروستیو کلونو کې پیسو د ډالرو پر وړاندې په بې ساري توګه خپل ارزښت له لاسه ورکړی دی.
له دې سره، پاکستان له تیرو څو لسیزو راهېسې د پیسو نړیوال صندق او نړۍوال بانک ستر پور اخېستونکی هم دی.
نړیوال بانک په ۲۰۲۳ کال کې د یوه راپور په خپرولو سره د پاکستان اقتصادي وضعیت له ناورین سره مخ بللی او زیاته کړې یې وه، چې ددې هېواد ۴۰ سلنه نفوس د بیوزلۍ تر کرښې لاندې ژوند کوي.
د پاکستان خلک هم ورځ تر بلې د ګرانۍ له امله سرټکوي.
