د یمن دولت یو ویاند د رویټرز خبري اژانس ته ویلي، چې د دوشنبې پر ورځ امریکا او بریټانیا د یمن په لویديځو بندرونو او ښاري سیمو کې د حوثیانو پر مورچلو بریدونه کړي دي. د دغه یمني چارواکي په خبره، په دغو بریدونو کې ۱۱ تنه وژل شوي او ۱۴ نور یې ټپیان شوي دي.
د حوثیانو تر کنټرول لاندې د المیسرې ټلویزیوني شبکې رپوټ ورکړی، چې لږ تر لږه ۱۷ هوایي بریدونه پر یمن او د حدیدې په بندري ښارونو شوي چې ډېر یې د راس عیسی په بندر شوي دي.
دغه بریدونه د روژې میاشتې په لومړۍ ورځ له هغې وروسته شوي، چې د بریټانیې یوه بېړۍ د حوثیانو په بریدونو کې ډوبه شوه.
امریکا او بریټانیا په لومړي ځل د جنورۍ په میاشت کې په سره سمندرګي کې د حوثیانو د بریدونو وروسته چې پر سوداګریزو بېړیو یې کړي وو د یمن پر پوځي اډو بریدونه پیل کړل.
هم مهاله د ایران د ملاتړه برخمنه دغه ډله وایي، چې د سوداګریزو بېړیو پر ضد به په سره سمندرګي کې خپلو بریدونو ته دوام ورکوي.
