د بریتانیا د چکرل ښار ټولنه وايي، چې په یوه پوځي کمپ کې افغان کډوالو له اړتیا ډېرې عامه مرستې ترلاسه کړې دي. دغې ټولنې د دې ښار له خلکو د مننې ترڅنګ ویلي، چې مرستې کافي دي او د جامو، لوبتوکو او د روغتیاي محصولاتو برخه کې نورې مرستې ته اړتیا نشته.
د (dorsetecho) ورځپاڼې د راپور له مخې، دغو افغان کډوالو بریتانیا ته له رسېدو وروسته د خپلو ماشومانو لپاره کافي جامې او وسایل نه لرل، خو د اړتیا وړ توکي ورته د چکرل ښار د ټولنې او سیمه ییزو ډلو په همکارۍ چمتو او ورکړل شول.
دغه افغان کډوال په موقتي کمپت کې اوسېږي او ویل شوي چې دایمي استوګنځیو ته به انتقال شي.
دغو افغان کډوالو پخوا په افغانستان کې د بریتانیا له وسله والو ځواکونو او د دغه هېواد له نورو دولتي څانګو سره همکاري کړې ده.
طالبانو په یو مکتوب کې چې زموږ لاس ته هم رسېدلی، لیکلي يو شمېر نا دولتي ادارو د دوی سپارښتنې له پامه غورځولې او خپل تدارکاتي بهیر «په خپلسرې» توګه پر مخ بیایي.
په دغه مکتبوب کې ټینګار شوی، چې کورنۍ او بهرنۍ نادولتي ادارې «اړې» دي چې د خپلو تدارکاتي پړاوونو پر مهال د اقتصاد وزارت استازو ته هم د څارونکي په توګه بلنه ورکړي.
دغه سند د کب په ۲۱مه صادر شوی او د اقتصاد وزارت مالي او اداري مرستیال لاسلیک کړی هم دی.
د طالبانو حکومت تورن دی چې د نادولتي ادارو په چارو کې لاسوهنه کوي او په دې کار سره د مرسته رسونکو ادارو چارې هم ټکنۍ شوې دي.
د لېندۍ په میاشت کې د ملګرو ملتونو د بشري مرستو د همغږۍ د دفتر مشر رامش راجاسنګام ویلي و، چې طالبانو د مرسته رسوونکو ادارو په چارو کې لاسوهنه ډېره کړې ده. دغه لاسوهنې تر ډېره د کارکوونکو د ګومارنې او د طالبانو په ګټه د مرستو د وېش په برخو کې کېږي.
وال سټریټ ژورنال تېر کال د وري په میاشت کې راپور ورکړی و، چې طالبانو د مرستو د وېش او د موسساتو د کارکوونکو په ګومارلو کې لاسوهنه کړې وه او له ادارو یې غوښتي و چې خپلې پروژې د هغوی په خوښه وکاروي.
په نادولتي ادارو کې د طالبانو د لاسوهنې بله بڼه په دغو ادارو کې د ښځو په کار کولو د بندیزونو لګول دي، چې په ډېرو برخو کې د دغو ادارو د تړلو لامل هم شوي.
