کییف وايي، چې روسیې د یکشنبې په ورځ سهار وختي د اوکراین په لوېدیځه سیمه لویف کې مهمې زیربناوې په توغندیو په نښه کړي دي. د پولڼډ په وینا؛ د دغه لوی هوايي برید پر مهال یو روسيي کروز توغندی، د لڼډې مودې لپاره د دوی هوايي حریم ته هم ننوتلی دی.
کییف وايي، چې مسکو په دغه برید کې ۵۷ توغندي او بې پیلوټه الوتکې کارولي او په پلازمینه کییف کې یې هم ځينې ځایونه ویشتلي دي.
دغه برید د اوکراین د برېښنا په تاسیساتو د روسیې له پراخ برید دوه ورځې وروسته ترسره شوی دی.
د لویف سیمې والي مکسیم کوزیټسکي د ټیلیګرام په یو پیغام کې ویلي: " دوه لومړني بریدونه پر مهمو زیربنایي تاسیساتو د شپې له خوا ترسره شوي دي."
هغه زیاته کړه، په برید کې د کنزل هایپرسونیک توغندي کارول شوي، چې خنثی کول یې سخت دي. هغه د په نښه شویو تاسیساتو نوم نه دی اخیستی.
د اوکراین د انرژۍ وزارت وايي، چې په لویف کې د بریښنا پر یو مهم مرکز له برید وروسته هلته تجهیزاتو اور اخیستی او د بریښنا د پرې کېدو سبب شوې.
د اوکراین هوايي ځواک وویل، چې هوايي دفاع له ۲۹ توغندیو څخه ۱۸ او له ۲۸ بې پېلوټه الوتکو څخه ۲۵ یې له رانسکورې کړي دي.
د دغو بریدونو له امله د اوښتو زیانونو په اړه لا څه نه دي ویل شوي؛ خو داسې ښکاري روسیه هڅه کوي چې د برېښنایي تاسیساتو په نښه کولو سره په اوکراین خپل فشار ډېر کړي.
د انرژۍ وزارت ویلي؛ اوکراین چې په وروستیو اونیو کې د برېښنا صادر کوونکی هېواد و اوس یې د برېښنا واردات په چټکۍ سره زیات کړي او د یکشنبې په ورځ یې د انرژۍ پر سیسټم تر بریدونو وروسته د برېښنا صادرول په بشپړه توګه بند کړي دي.
