د خیبر پښتونخوا د شانګلې په بشام کې د یوه ځانمرګي برید له امله ۵ چینایي انجنیران ووژل او یو شمېر نور ټپيان شوي دي. د پاکستان امنیتي مسوولان وایي، په دې پېښه کې بریدګر خپل موټربم ته د هغو چینایي انجنیرانو له موټر سره نږدې چاودنه ور کړه، چې داسو بند ته روان و.
د پښتونخوا د پولیسو مشر محمد علي ګنډاپور له رویټرز سره په خبرو کې د پېښې په تایید سره وایي، چې په دغه برید کې پر ۵ چینایي انجنیرانو سربېره د هغوی یو پاکستانی موټروان هم وژل شوی دی.
د نوموړي په خبره، دا کسان له اسلام اباد څخه د کوهستان خوا ته داسو بند ته روان و، چې د برید ښکار شول.
پولیس د پېښې ځای ته رسېدلي او ټپيان چې دقیق شمېر یې روښانه نه دی روغتون ته لېږدول شوي دي.
چین چې په پاکستان کې د داسو بند پر لویه پروژه پانګونه کړې، دا دویم ځل دی چې پر چینایي انجنیرانو خونړی برید کیږي.
په ۲۰۲۱ کال کې هم داسو بند ته څېرمه په یوه برید کې د ۹ چینايي انجینرانو په ګډون ۱۳ کسان ووژل شول.
دا برید څو ساعته وروسته له هغه وشو چې وسله والو د پاکستان د سمندري ځواکونو پر یوې هوايي اډې برید وکړ.
په دې پېښه کې یو سرتیری وژل شوی چې د پاکستاني ځواکونو په ځوابي ډزو کې پنځه بریدګر وژل شوي دي.
