د ملګرو ملتونو د بشري چارو مشر مارتین ګریفیتس د روغتیايي لاملونو له امله له دندې ګوښه شو
د ملګرو ملتونو د بشري چارو مشر مارتین ګرېفیتس چې د غزې تړانګې ته یې د مرستو په رسولو کې مهم رول لوبولی، اعلان کړی چې د ناروغۍ له امله به له دندې ګوښه شي.
د ملګرو ملتونو د بشري چارو مشر مارتین ګرېفیتس چې د غزې تړانګې ته یې د مرستو په رسولو کې مهم رول لوبولی، اعلان کړی چې د ناروغۍ له امله به له دندې ګوښه شي.
ګرېفیتس چې د ملګرو ملتونو د بشري چارو د همغږۍ دفتر (اوچا) مشري یې هم کړې او د درېیو کلونو لپاره یې د بېړنیو مرستو همغږي کوونکي په توګه دنده ترسره کړې، وویل چې هغه سرمنشي انتونیو ګوترېش ته خبر ورکړی چې د جون په میاشت کې به استعفا وکړي.
تېره میاشت ګرېفیتس اسراییل ته خبرداری ورکړی و، چې د سویلي غزې په رفح ښار کې د پلان شوي برید پر وړاندې غوښتنې له پامه ونه غورځوي، چیرې چې ۱.۵ مېلیونه فلسطینیانو پناه اخیستې.
هغه ویلي و:« پر اسراییل د اکټوبر د اوومې نېټې بریدونه وحشتناک دي، ما په وار وار غندلي؛ خو دوی نشي کولای هغه څه توجیه کړي، چې په غزه کې د هر ماشوم، مېرمنې او نارینه سره پېښیږي.»
د غزې ترڅنګ هغه په روانه میاشت کې خبرداری ورکړ، چې په راتلونکو میاشتو کې به په سوډان کې نږدې پنځه مېلیونه خلک له پراخې لوږې سره مخ شي.
ګرېفیتس مخکې د یمن لپاره د ملګرو ملتونو د ځانګړي استازي په توګه دنده ترسره کړي او د سوریې په چارو کې یې سلاکار پاتې شوی دی.
هغه د نورو نړۍوالو بشري سازمانونو لپاره هم کار کړی دی.
