د تورخم په پوله، لنډي کوتل کې د پاکستاني سرحدي ځواکونو او طالبانو د ناوړه چلند له امله لسګونو ځايي پاکستاني کارګرانو د پرلت خیمه ودروله. معترضان وايي، سره له دې چې د تګ راتګ قانوني اسناد لري، خو سرحدي ځواکونه ورسره ناسم او سخت چلند کوي.
د معترضو کارګرو استازی فرمیدالله شینواري د سې شنبه په ورځ ډان ورځپاڼې ته وویل: «که څه هم کارګر د ټولو قراردادونو او سرحدي قوانینو درناوی کوي او د شاوخوا ۷۰۰ کارګرانو له ډلې نیمایي یې پاسپورټونه او ویزې لري، خو دوی ته اجازه نه ورکول کېږي چې د پولې دواړو غاړو ته کار ته دوام ورکړي.»
نوموړي زياته کړه، چې طالب چارواکو په دې لار کې د ١٥ سيمه ييزو کارګرانو قانوني اسناد له ځانه سره ضبط کړي او هغوی یې شکنجه کړي دي او يوه اندازه خوراکي توکي يې هم مصادره کړي، چې افغانستان ته يې لېږدول.
معترضین خبرداری ورکوي، چې که دا وضعیت دوام وکړي او ستونزه هواره نه شي، نو دوی به د تورخم لويه لاره وتړي.
د کارګرانو استازی وایي، چې د دوی هیڅ همکار د نشه يي توکو، پیسو او وسلو په غیر قانوني سوداګرۍ کې تر اوسه لاس نه لري، خو کارګران اجازه نه لري چې خپل قانوني کوچني کاروبار ته دوام ورکړي.
معترضینو ویلي، په داسې حال کې چې تر اوسه يې له امنيتي، ګمرکي او د کډوالۍ له چارواکو، ځايي مشرانو او سياستوالو سره ليدلي او له طالبانو سره يې هم د دې ستونزې د هواري لپاره خبرې کړې دي، خو دغو خبرو کومه پايله نه درلوده.
