په افغانستان کې د خوړو نړۍوال پروګرام د تغذیې برخې مشره مونا شیخ وایي:« له بده مرغه سږکال موږ د بدې لوړې شمېرې وړاندوینه کوو، چې په افغانستان کې به ۳ مېلیونه ماشومان له خوارځواکۍ سره مخامخ شي.»
هغې په خپل یوه ویډیویي پیغام کې ویلي، چې له دغې ډلې څخه به یوازې له ۱.۶ مېلیونه کسانو سره مرسته وشي.
هغه وایي، تېر کال یې تمه لرله چې په ټول افغانستان کې به ۸۰۰.۰۰۰ هغه مېرمنې چې مېندواره او شېدې ورکوونکې دي او هم له خوارځواکۍ سره مخامخې دي دوی مرسته ورسوي؛ خو په وینا یې دغه شمېر ۱.۲ مېلیونو ته لوړ شوی و.
هغه وایي، په خوارځواکۍ اخته ماشومان او مېرمنې د دوی په شاوخوا ۲۷۰۰ کلینیکونو کې تر درملنې لاندې دي.
تر دې وړاندې د خوړو نړۍوال پروګرام د خوړو د برخې مشر راجرز وینیاما د فبرورۍ په ۲۴مه ویلي و:« د افغانستان د خوړو څانګه اټکل کوي، چې په ۲۰۲۴کال کې به شاوخوا څلور مېلیونه ښځې او ماشومان د سختې خوارځواکۍ سره مخ وي.»
تېرو وروستیو کې د سویډن کمېټې هم د خپلو مالوماتو پر بنسټ ویلي و، چې په ۲۰۲۳ کال کې یې په سختې خوارځواکۍ د اخته شویو ۴۳ زره ماشومانو درملنه کړې ده.
