د طالبانو د کورنیو چارو وزارت د نشهیي توکو پر وړاندې د مبارزې معینیت وایي، تر دې دمه یې له کابل ښاره تر ۴۹ زره ډېر سوالګر ټول کړي دي. د دغه معینیت یوه چارواکي حسیب الله احمدي د طالبانو تر کنټرول لاندې ملي ټلویزیون ته ویلي، چې تر دې دمه یې شاوخوا ۴۹۶۴۱ سوالګر ټول کړي.
هغه ویلي، چې د دغو سوالګرو له ډلې ۱۴۹۳۲ یې ښځینه، ۲۲۷۲۵ یې نارینه او ۴۰۶۵ ماشومان وو.
د دغو شمېرو له مخې، د سوالګرو لویه برخه ښځینه جوړوي.
د هغه په وینا، دغه سوالګر له راټولو وروسته ځانګړو کمېسیونونو ته ورپېژندل کېږي او له تثبیت وروسته دوی ته لازمې حرفوي زدهکړې ورکول کېږي او ترڅنګ یې ورسره نورې مرستې هم کېږي.
خو کابل ښاریان وایي، د دغې پروسې له پیل راهیسې لاتراوسه په پلازمینه کې د سوالګرو شمېر نه دی کم شوی.
د کابل یو اوسېدونکی احمد وایي، چې وزګارۍ او بې وزلۍ خلک سوالګرۍ ته اړ اېستي دي.
د هغه په وینا، نن سبا مېندې او پلرونه د ماشومانو د نس مړولو لپاره سوالګري کوي او طالبانو د ښځینه دولتي کارکوونکو تر څنګ ډېر نارینه هم له دندو شړلي او د شاوخوا درې کالو په تېرېدو یې متقاعدو کارکوونکو ته د هغوی امتیازات نه دي ورکړي.
داسې راپورونه هم شته، چې په دغو سوالګرو کې یو شمېر یې د دولت پخواني کارکوونکي او تقاعد شوي کسان دي.
