د ازبکستان د کورنیو چارو وزارت د دغه هېواد امنیتي او انتظامي ځواکونو ته امر کړی، چې د احتمالي ترهګریزو ګواښونو او بیړنیو پېښو د مخنیوي په موخه په عامه ځایونو کې امنیتي تابیاوې زیاتې کړي.
د ازبکستان رسنیو د شنبې په ورځ د (د وري ۱۱مه) خبر ورکړی، چې د دغه هېواد چارواکو د ترهګرۍ پر وړاندې د امنیتي چمتووالي په موخه غونډه وکړه.
په دې غونډه کې د عامه نظم او د ښاریانو د امنیت ټينګښت په موخه د انتظامي ځواکونو او سوداګریزو قطعو ترمنځ د همکارۍ په پیاوړتیا ټینګار وشو.
همدارنګه د ازبکستان د کورنیو چارو وزارت د دغه هېواد ملي پوځ ته امر کړی چې د عامه نظم د ټینګښت او د احتمالي ترهګریزو کړنو د مخنیوي په موخه دې اغېزمنې امنیتي تاتبیاوې ونیسي.
دغه وزارت ټینګار کړی؛ امنیتي چمتوالی باید په هغو سیمو کې جدي ونیول شي، چې د خلکو ګڼه ګوڼه پکې زیاته ده.
که څه هم د ازبکستان د کورنیو چارو وزارت کومې ځانګړې ترهګریزې ډلې ته اشاره نه ده کړې، خو پر مسکو د داعش ډلې له برید وروسته د سیمې او نړۍ هېوادونو د ترهګریزو بریدونو د پراخېدو په اړه اندېښنه ښودلې ده.
تر دې مخکې د فرانسې په ګډون یو شمېر اروپايي هېوادونو خپلې امنیتي چمتووالي تر ټولو لوړې کچې ته رسولي او زرګونه پوځیان یې په عامه ځایونو کې ځای پر ځای کړي دي.
