طالبانو په خوست کې شپږ کسان د «چل او فریب» په تور په عام محضر کې په دورو وهلي

د طالبانو د سترې محکمې ویاند عبدالرحیم راشد تېره ورځ یکشنبه د (وري ۱۲مه) له رسنیو سره د خبرو پر مهال ويلي چې نړېواله ټولنه دې په افغانستان کې د شریعت د پلي کېدو په وړاندې «منفي تبلیغات» نه کوي.

هغه وايي، دوی به په افغانستان کې په «بشپړ ډول شریعت» پلی کوي او په دې برخه کې د نورو فشارونو ته پام نه کوي. نوموړی وړاندې وايي: «د اسلامي امارت ستره محکمه د الهي احکامو د پلي کولو په برخه کې د چا غبرګون ته پام نه کوي هغه که نړېوال وي یا نور، ستره محکمه د نورو فشارونو ته غاړه نه ږدي.»

طالبانو په دې وروستیو کې د افغانستان په بېلابېلو ولایتونو کې د قتل، غلا، اخلاقي فساد، نامشروع اړیکو او نورو برخو په تورونو په عام محضر کې خلکو ته د جسمي سزاګانو لړۍ پیل کړې او وايي چې دا لړۍ به روانه وي.

په دې وروستیو کې ملګرو ملتونو په افغانستان کې د جسمي مجازاتو د دوام په اړه اندېښنه څرګنده کړې او له طالبانو یې غوښتي چې د جسمي مجازاتو چې د انساني کرامت خلاف او ظالمانه عمل دی مخه ونیسي.

خو د طالبانو ډلې ویلي چې اسلامي شریعت پلي کوي او دا هېوادونه او سازمانونه دې د افغانستان په کورنیو چارو کې لاسوهنه نه کوي.

د غزني ولایت لپاره د طالبانو د اطلاعات او کلتور مشر وايي، د یکشنبې په ورځ د (وري ۱۲مه) ناوخته د غزني ولایت د ګېرو ولسوالۍ په ځدراڼ سیمه کې د ماشومانو له لوري د یوه پخواني ماین له پیدا کېدو وروسته ماین چاودنه کړې چې له امله یې نهه ماشومان وژل شوي دي.

د طالبانو تر واک لاندې باختر خبري اژانس د غزني د اطلاعات او کلتور د مشر حمیدالله نثار له قوله ویلي چې یاد ماین د پخوانیو جګړو له وخته په سیمه کې پاتې و.

له غزني څخه سرچینو افغانستان انټرنشنل ـ پښتو ته ویلي چې په په وژل شویو ماشومانو کې پنځه نجونې وې چې عمرونه یې له پنځه تر لس کلو او څلور هلکان وو چې عمرونه له لس تر ۱۴ کلو پورېوو.

د تېر جمهوري حکومت پر مهال به طالبانو د تېر حکومت او بهرنیو ځواکونو د امنیتي کتارونو ته پرته له کومې نقشې په لارو او پټیو کې ماینونه خښول چې بیا به یې ځای ترې هېرېده او هغه به وخت نا وخت پر خلکو الووتل او مرګ ژوبله به یې ور اړوله.

د هلمند د ګرشک ولسوالۍ ځايي اوسېدونکو افغانستان انټرنشنل ـ پښتو ته ځینې ویډیو ګاني استولې چې لیدل کیږي د هلمند د ګرشک ولسوالۍ لپاره د طالبانو وسله وال کسان پر هټېوالو ډزي کوي.

افغانستان انټرنشنل ـ پښتو ته په لیږل شوي ویډیو کې لیدل کیږي چې پر یوه ډله هټېوالو په دوامداره توګه د طالبانو وسله وال کسان له لوري ډزې کیږي او خلک د مرمیو لګیدو له وېرې منډې وهي.

په یوه بله ویډیو کې لیدل کیږي چې یو شمېر هټېوال د طالب وسله والو له لوري ډبول شوي هم دي.

سرچیني وايي، د ګرشک د ښاروال طیب مولوي د ساتونکو له لوري په دزو کې پنځه هټېوال ټپیان شوي دي.

په هلمند کې د طالبانو سیمه ییزو چارواکو تر اوسه پورې په دې اړه څه نه دي ویلي خو، د یادې ولسوالۍ ځايي اوسیدونکي وايي، د ګرشک ښاروالۍ له لوري د کندهارـ هرات د عمومي سړک د پراخېدو په اړه یو شمېر هټېوالو ته خبر ورکړل شوی و چې د یاد سړک د پراخېدو د کارونو له پیل مخکې له دوکانونوخپل توکي وباسي.

د ګرشک ځايي اوسیدونکي وايي، د طالبانو له خبرتیا وروسته د ښاروالۍ کارکوونکو هڅه کوله چې یادې هټۍ ړنګې کړي خو دوکاندارانو د ښاروالۍ له کارکوونکو سره لاس اچولی او له شخړې وروسته د دغې ولسوالۍ د ښاروال طیب مولوي ساتونکو پر هټېوالو ډزي کړې دي.

د پاکستان د بلوچستان ایالت د اطلاعاتو مخکني وزیر جان اڅکزي نن دوشنبه د (وري ۱۳مه) په ایکس پاڼه لیکلي چې د طالبانو حکومت د «استخباراتو ادارې دغه اډه د امریکا بې پيلوټه الوتکو ته په سیمه کې د داعش وسله والې ډلې په وړاندې د عملیاتو لپاره په واک کې ورکړې.»

هغه د افغانستان په هوايي حریم کې د امریکايي بې پیلوټه الوتکو د ګزمو پر ضد د طالبانو د ویاند ذبیح الله مجاهد د غبرګون په تړاو ویلي چې «ریښتیا بل څه دي.»

تر هغه وړاندې د طالبانو ویاند ذبیح الله مجاهد ویلي و چې د افغانستان په هوايي حریم بې پیلوټه الوتکې د امریکا دي او له ځینې نږدې هیوادونو الوتنې کوي چې وايي دوی یې په اړه اعتراض کړی چې د افغانستان پر هوايي حریم تیری نور ودروي.

جان اڅکزی وړاندې وايي، «دغه اډه د طالبانو د استخباراتو له لوري له امریکايي قراردادیانو سره د همکارۍ په موخه ورکړل شوې ده.»

د طالبانو حکومت لا تر اوسه پورې د جان اڅکزي دغې ادعا ته غبرګون نه دی ښودلی.

تر دې وړاندې د امریکا د پخواني ولسمشر ډونلډ ټرمپ ځانګړی مرستیال کریسټوفر کوسټا ویلي و، چې په افغانستان کې د داعش د ماتولو لپاره باید له طالبانو سره په ګډه کار وشي.

ښاغلي کوسټا د یکشنبې په ورځ په نیویارک ټایمز کې له کولن کلارک سره په یوه ګډه مقاله کې لیکلي چې «طالبان د باور وړ ځواک نه دی چې داعش ته ماتې ورکړي او یا په افغانستان کې نورې ترهګرې ډلې مهار کړي. خو دغه ډله باید وهڅول شي چې د داعش په وړاندې خپل فعالیتونه ګړندي کړي.»

د وري میاشتې په دویمه په کندهار کې او د وري درېیمه په مسکو کې د داعش له بریدونو وروسته د سیمې او نړۍ هيوادونو د دغې ډلې د بیا فعالېدو په اړه اندېښنې ښودلې دي. او داعش یې ټولو هیوادونو ته لوی ګواښ بللی.

مکینزي له این بي سي ټلویزیون سره د یکشنبې په ورځ (وري ۱۲مه) په مرکه کې له افغانستانه د امریکايي ځواکونو وتل په افغانستان کې د داعش خراسان څانګې د ودې لامل ګڼلی او د دغې ډلې د نړیوالو ګواښونو د زیاتوالي په اړه یې خبرداری ورکړی.

نوموړی په دې باور دی چې امریکا باید د ۲۰۲۱ کال په اګست کې له افغانستان څخه د بشپړ وتلو پر ځای په افغانستان کې د خپلو ځواکونو یوه برخه ساتلې وای. هغه د امریکا د ولسمشر جوبایډن څرګندونو ته په اشارې سره چې په افغانستان کې له لرې واټنه د څارنې وړتیا لري، وویل چې «دا مهال په افغانستان کې موږ د دغه هېواد د څارنې توان نه لرو.»

دغه جنرال په افغانستان کې د امریکايي ځواکونو نه شتون د داعش او نورو وسله والو ډلو لپاره یو نعمت وباله او زیاته یې کړه: «له بده مرغه موږ نور پر هغوی فشار نه راوړو، نو دوی واک ته د رسېدو لپاره ازاد دي، د پلان جوړولو او همغږي کولو لپاره یې ازادي لري.»

امریکايي چارواکو په وار وار په افغانستان کې د داعش د خراسان څانګې د شتون او پراخ فعالیت په اړه خبرداری ورکړی دی. د دې میاشتې په پیل کې د جمهوري غوښتونکو یوه جګپوړي سناتور په افغانستان کې د دغې ډلې پر پټنځایونو د بریدونو غوښتنه کړې وه.

د سنټکام پخواني قوماندان د داعش د اغېز څرنګوالي ته هم اشاره وکړه، او ویې ویل چې دغه ډله د ټولنیزو شبکو له لارې ګومارنې او مخامخ روزنه کې د سختو فعالیتونو لپاره جنګیالي چمتو کوي.

تر دې مخکې د روسيې دولتي خبري اژانس د خپلو سرچينو په حواله ليکلي وو، چې په مسکو کې د کروکس کنسرت پر تالار بريد کوونکي د«خراسان غږ» ټيليګرام چينل له لارې چې په داعش خراسان ډله پورې تړاو لري، ګومارل شوي وو.

ښاغلي مکینزي په مسکو کې د داعش د خراسان څانګې له خوا د وري میاشتې درېیمه، ترسره شوي برید ته په اشارې سره چې لږ تر لږه ۱۴۰ کسان په کې ووژل شول وویل چې دغه وسله واله ډله تر دې لا ډېر ګواښوونکي او پراخ عملیات تنظیم کولی شي.