په سوریه کې د ایران پر کونسلګرۍ له برید یوه ورځ وروسته د اسلامي جمهوریت مذهبي مشر وویل، چې اسراییل به د دوی د «زړور ولس»له خوا مجازات شي. سید علي خامنه یي په خپل اېکس کې لیکلي، چې د سپاه د غړو وژل کېدل د ایران لپاره سخت دي.
نوموړي د سې شنبه په ورځ دغه راز په اېکس کې زیاته کړې، چې محمد رضا زاهدي او محمد هادي حاجي رحیمي د اسراییلو له خوا وژل شوي دي.
هغه لیکلي: «زمونږ شهیدانو د خدای له دربار څخه خپل مجاهدت ترلاسه کړ.»
د اسلامي جمهوریت مذهبي مشر ویلي، چې محمد رضا زاهدي له ۶۰ لسیزې د جګړو په ډګرونو کې د شهادت په تمه و.
خامنه یي زیاته کړې، چې د سپاه غړو څه له لاسه نه دي ورکړي او خپله بدله یې ترلاسه کړې ده.
نوموړي اسراییل ته خبرداری ورکړ، چې ایران به دغه هېواد په دغه جنایت پښیمانه کړي.
د اسلامي جمهوریت رسمي خبري اژانس د سپاه د هغو اوو غړو انځورونه خپاره کړل، چې په سوریه کې د اسراییلو د هوایي بریدونو له امله وژل شوي.
محمدرضا زاهدي او محمد هادي حاجي رحیمي د سپاه پاسدارانو لوړپوړي قومندانان وو، چې په دې پېښه کې ووژل شول.
حسین اماناللهي، مهدي جلالتي، محسن صداقت، علي اقابابایي او علي صالحي روزبهاني په دمشق کې د سپاه نور وژل شوي غړي دي.
سره له دې چې اسلامي جمهوریت وایي، په سوریه کې د ایران په کونسلګرۍ اسراییل برید کړی، خو اسراییل بیا په رسمي توګه ددې برید مسوولیت پر غاړه نه دی اخیستی.
