په طالبانو پورې تړلې د المرصاد ویب پاڼې په یو مطلب کې لیکلي چې د طالبانو حکومت بهرنۍ تګلارې پاکستان په نړېواله کچه منزوي کړی او باور ته یې زیان ور رسولی. مطلب وړاندې لیکلي، چې پاکستان د ترهګرو ډلو په کارولو سره غواړي په سیمه او نړۍ فشار واچوي.
د طالبانو المرصاد ویب پاڼې تر دې وړاندې هم د پاکستان په حکومت او پوځ نیوکې کړې او له هغو خبرو پرده پورته کوي چې تر دې وړاندې د طالبانو او پاکستان تر منځ د یوه راز په توګه خوندي وې.المرصاد له هغه وروسته دا مطلب لیکلی چې وړمه ورځ د پاکستان د دفاع وزیر خواجه اصف یو ځلې بیا له افغانستانه د دوی د حکومت پر ضد د ګواښونو د ډېروالي خبره کړې وه او دا ځل یې په زغرده ویلي، چې نور د واکمنو طالبانو لپاره د پاکستان انتخابونه مخ په محدودېدو دي.خواجه اصف د خپل هېواد پارلمان ته د وینا پر مهال د دغو انتخابونو د محدودېدو په اړه یې نور جزییات نه دي ورکړي.د طالبانو د استخباراتو دغې ویب پاڼې وړاندې لیکلي، «سره له دې چې په تېرو شلو کلونو کې پاکستان په اصطلاح د ترهګرۍ ضد مبارزې په نوم له نړیوالو څخه پرېمانه امکانات او امتیازات ترلاسه کړل، د بهرنیانو سترګو ته یې په خپله چالاکۍ او مکارۍ خاورې ورشیندلې دي.»د طالبانو له بیا ځل واکمنۍ چې دوه نیم کاله تېرېږي، په پاکستان کې ځانمرګي او وسله وال بریدونه ډیر شوي او په بیلابیلو هدفي وژنو د دغه هيواد پوځ، پولیس، ولسي کسان او نور فعالان د وسله والو له لوري وژل کیږي چې پاکستان یې د پړې ګوته په کابل کې طالبانو ته نیسي او وايي چې دغه بریدونه تحریک طالبان پاکستان د افغانستان له خاورې څخه پلانوي او بیا په پاکستان کې ناکراري جوړوي.دغو ناندریو وروسته له هغې زور اخیستی چې تېره میاشت د قبایلي سیمې شمالي وزیرستان په میرعلي کې د پوځ په یوه مرکز ځانمرګي او وسله وال بریدونه وشول چې له شلو زیات پوځیان په کې ووژل او ټپیان شول، چې پاکستان یې په غچ کې د پکتیکا او خوست ځینې سیمې بمبار کړې او د طالبانو په خبره تر نهو پورې ولسي خلک یې په کې ووژل.المرصاد په دغه مطلب کې لیکلي چې پاکستان په کابل کې له طالبانو سره د جګړې کولو پلمه غواړي خو وايي، د طالبانو مشران نه غواړي اوس د جګړې لاره غوره کړي.د طالبانو کورنیو چارو وزارت مرستیال محمد نبي عمري هم د دوشبني په ماښام په خوست ولایت کې یوې ولسي ناستې د وینا پر مهال ويلي چې دوی د جګړې توان نه لري، او له پاکستاني طالبانو یې غوښتي چې د پاکستان له حکومت سره دې خبرو ته کیني.
