سرچېنو ویلي، د سه شنبې پر مازیګر د څو ساعتونو لپاره بې پیلوټه الوتکې د ملاهبت الله د دفتر پر سر څرخېدلې. د دغو سرچېنو په خبره، دغو بې پیلوټه الوتکو طالبانو ته اندېښنې پیدا کړې او هغوی یې اړ کړل چې خپل مشر په پنجوایي ولسوالۍ کې یوې پوځي اډې ته ولېږدوي.
سرچېنو افغانستان انټرنشنل ته ویلي، له هغه وروسته چې بې پیلوټه الوتکو د څو ساعتونو لپاره د ملا هبت الله د دفتر د پاسه الوتنې وکړې، د طالبانو د مشر د ساتونکو ډلې قوماندان مولوي عبدالاحد طالب دغه کړنه د هبت الله اخندزاده لپاره یو «ستر ګواښ» وباله او د هغه د استوګنځي د بدلولو پرېکړه یې وکړه.
دغه پېښه پرون (سه شنبه د وري ۱۴مه) د مازیګر په څلورو بجو شوې ده.
د سرچېنو د مالوماتو له مخې، د طالبانو مشر د پنجوايي په ولسوالۍ کې د « تلوکان پوځي اډې» ته لېږدول شوی دی.
تر دې وړاندې هم کندهار مېشتو د دغه ولایت پر فضا کې د بې پیلوټه الوتکو د الوتنو خبر ورکړی و.
دا رنګه په تېرو ورځو کې د بدخشان، پنجشیر، کونړ او لغمان ولایتونو اوسېدونکو هم افغانستان انټرنشنل ته ویلي وو، چې په دغو ولایتونو کې هم بې پیلوټه الوتکې الوتنې کوي.
د طالبانو ویاند د دغو الوتنو په غبرګون کې امریکا د افغانستان د هوايي حریم څخه پر «سرغړونې» تورنه کړې وه.
سیمهییزو رسنیو د ذبیح الله مجاهد له قوله لیکلي وو:« دغه الوتکې له شک پرته امریکايي الوتکې دي، چې د ځینو نږدې هېوادونو څخه الوتنې کوي او افغانستان ته راځي او هر څوک باید په دې برخه کې خپل مسوولیتونه وپېژني او دغه تېري نور ودروي.»
له افغانستانه د امریکایي ځواکونو پر مهال هغه هېواد ویلي و، چې په افغانستان کې ټول ترهګریز ګواښونه د دوی تر څار لاندې دي.
یو شمېر طالب چارواکو له هغې ډلې د طالبانو د دفاع وزیر او لوی درستیز هم نیوکې کړې وې، چې د افغانستان هوایي حریم لا هم د امریکا په «واک» کې دی.
