د طالبانو د غور ولایت چارواکي وايي، تېره شپه د دغه ولایت په چهارسده ولسوالۍ قورنج سیمه کې له غره څخه راښوېدلی کمر په یوه کور ور برابر شوی چې له امله یې د یوې کورنۍ پنځه تنه مړه شوي. ويل کیږي په مړو شویو کې درې تنه ماشومان او دوه لویان شامل دي.
د غور ولایت د امنیه قومندانۍ ویاند عبدالرحمن بدري رسنیو ته ویلي، چې دغه پېښه تېره شپه هغه مهال رامنځته شوې چې له غره څخه یو لوی کمر راښوېدلی او د استوګنې په یوه کور ور برابر شوی چې له امله یې پنځه کسان مړه شوي.
هغه وايي، د پېښې د څېړلو او د دغې کورنۍ د ستونزو د هواري لپاره یې یو پلاوی سیمې ته استولی، چې له دغې کورنۍ سره مرسته وکړي.
تر دې وړاندې په سلواغې میاشت کې د نورستان ولایت په نورګرام ولسوالۍ کې د غره ښوېدنې په پېښه کې تر شلو زیات کورونه له تېږو او خاورو لاندي شوي وو او ۲۵ تنه په کې مړه شوي وو.
