ځايي سرچینو افغانستان انټرنیشنل ته ویډیوګانې لېږلي، چې طالبان په کندهار کې د عیدګاه جومات شاوخوا امنیتي دېوالونه جوړوي. طالبان اندېښنه لري، چې د دې ډلې مشر ملا هبت الله اخندزاده به د اختر د لمانځه پر مهال د داعش د برید هدف وګرځي.
په هغه ویډیو کې، چې د یکشنبې په ورځ (د وري په ۱۹مه) د افغانستان انټرنشنل ته رسېدلې، لیدل کېږي چې د طالبانو پوځي موټر د کندهار د عیدګاه جومات شاوخوا امنیتي دېوالونه ښکته کوي.
د عیني شاهدانو په وینا، طالبانو د عیدګاه جومات په شاوخوا کې امنیتي دېوالونه جوړوي.
دا ویډیو یوه ورځ وروسته له هغې خپره شوه، چې د افغانستان انټرنشنل د باخبرو سرچینو په حواله په دغه ولایت کې د طالبانو د یوې امنیتي غونډې جزیات خپاره کړل.
د افغانستان انټرنشنل ته د ورکړل شویو معلوماتو له مخې، د جمعې په ورځ د وري په ۱۷مه، طالب چارواکو په کندهار کې په یوه امنیتي غونډه کې د اختر پر لمانځه د داعش د برید د احتمال په اړه اندېښنه څرګنده کړه.
په غونډه کې ویل شوي، چې داعش ښايي په کندهار کې د کوچني اختر د لمانځه پر مهال د طالبانو پر مشر برید وکړي.
په دې لړ کې طالب چارواکو پرېکړه کړې، چې د اختر د لمانځه ځای له اختر یوه شپه مخکې وټاکي.
په دې غونډه کې دا پرېکړه هم وشوه، چې په کندهار کې به د کوچني اختر د لمانځه د ادا کولو لپاره استخباراتي او کشفي تدابیر زیات شي.
زموږ د معلوماتو له مخې، د طالبانو د مشر هبت الله اخندزاده لپاره د لوی اختر د لمانځه لپاره دوه ځایونه ټاکل شوي دي. یو یې د حضرت محمد جامع جومات او بل یې د کندهار عیدګاه جومات دی.
خو په غونډه کې ویل شوي، چې د هبت الله اخندزاده امنیتي ځواکونه به د اختر په شپه د لمانځه د ځای په اړه پرېکړه کوي.
د طالبانو په غونډه کې دا خبرداری هم ورکړل شوی چې داعش خلکو په منځ کې نفوذ کړی دی.
د معلوماتو له مخې، طالب چارواکو د کندهار د مرکزي زندان له مسوولینو په کلکه غوښتي، چې د اختر په ورځو کې د دغه زندان امنیت ته ډېره پاملرنه وکړي.
دا اندېښنې په داسې حال کې راپورته کېږي، چې څو اوونۍ وړاندې په کندهار کې د نوي کابل بانک د څانګې مخې ته په ځانمرګي برید کې لږ تر لږه ۴۳ کسان ووژل شول او ۴۵ نور ټپیان شول، چې پړه یې داعش ډلې منلې وه.
