سعودي عربستان او طالبان: د راتلونکې چهارشنبې ورځ د کوچني اختر لومړۍ ورځ ده
تازه سعودي عربستان او د طالبانو سترې محکمې اعلان کړی، چې د چهارشنبې ورځ (د حمل ۲۲مه) د کوچني اختر لومړۍ ورځ ده.
تازه سعودي عربستان او د طالبانو سترې محکمې اعلان کړی، چې د چهارشنبې ورځ (د حمل ۲۲مه) د کوچني اختر لومړۍ ورځ ده.
سعودي ګزټ ورځپاڼې خبر ورکړی، چې د دغه هېواد حکومت د سپوږمۍ د لیدنې له پروسې وروسته د چهارشنبې ورځ د کوچني اختر لومړۍ ورځ اعلان کړې ده.
په ورته وخت کې د طالبانو سترې محکمې هم اعلان کړی، چې د مرکز سربېره په ولایاتو کې چا د شوال د میاشتې سپوږمۍ نه ده لیدلې؛ نو پر همدې بنسټ به راتلونکې چهارشنبه د کوچني اختر لومړۍ ورځ وي.
طالبان دا علان د سعودي عربستان له اعلانه دوه ساعته وروسته کوي.
په ایران کې مېشت یو شمېر افغان کډوالو د افغانستان انټرنشنل فارسي څانګې ته ویلي، چې د اوسېدو د قانوني اسنادو سربېره هم د ایران پولیس افغان کډوال نیسي او له دغه هېواده یې وباسي.
د دوی په وینا؛ یو شمېر پولیس په شخصي لباس کې د ایران په عامه ځایونو کې افغان کډوال نیسي او زندانونو ته یې بیايي.
یو شمېر کډوالو افغانستان انټرنشنل - فارسي ته په لېږل شوي یاداشت کې لیکلي، چې پولیس د افغان کډوالو د نیولو پر مهال قانوني اسنادو لکه؛ پاسپورت، وېزې او د اوسېدو کارتونو ته پام نه کوي.
یو تن کډوال چې نیول شوی و، په یوې ویډیو کې چې افغانستان انټرنشنل ته ویلي چې پاسپورت او ویزه لري؛ خو د ایران اسلامي جمهوریت پولیسو هغه نیولی او له هېواده یې شړي.
نوموړي په دغه ویډیويي پیغام کې ویلي، کله چې کډوال د تهران په یوه بازار کې د لوی اختر د سودا د پېرلو لپاره ځي، پولیسو یې پېژني او نیسي یې.
په دې ویډیو کې دا هم لیدل کیږي، چې پولیس کډوال په یوه وین موټر سره لېږدوي او په یوه خونه کې یې بندیان کړي دي.
افغان کډوال له ایران څخه په زوره د کډوالو د ایستلو شکایت کوي، په داسې حال کې چې دغه هېواد هره ورځ سلګونه افغان کډوال توقیف او شړلي دي.
د ایران اسلامي جمهوریت چارواکو په وار - وار ټینګار کړی، چې له ایران څخه د افغان کډوالو د ایستلو پلان ته په جدي توګه دوام ورکوي؛ خو په تېر کال کې پاکستان او ایران لسګونه زره افغان کډوال په زوره ایستلي دي.
د افغانستان د ګاونډیو هېوادونو دغه اقدام د نړۍوالې ټولنې له توند غبرګون سره مخ شوی دی.
د کډوالو نړۍوالې ادارې ویلي، چې د کډوالو جبري ویستل د ټولو نړۍوالو کنوانسیونونو خلاف عمل دی.
د لبنان د حزب الله ډلې منشي حسن حزب الله وايي؛ وروسته له دې چې د اسراییل له خوا د ایران پر کونسلګرۍ برید شوی، اسراییل او امریکا د ایران حتمي غبرګون ته په تمه دي.
د لبنان د حزب الله عمومي منشي حسن نصرالله په سوریې کې د ایران په قونسلګرۍ باندې د اسراییل حملې ته په اشارې سره ویلي، چې امریکا او اسرايیل په دې پوه شوي دي، چې د دوی پر وړاندې به د ایران د اسلامي جمهوریت غبرګون خامخا راځي.
هغه په سوریه او لبنان کې د اسلامي انقلابي ګارډ ځواکونو شتون ته په اشارې سره، پر کونسلګرۍ برید د ایران پر خاوره برید وباله.
وروسته له هغې چې ایران په دمشق کې د دوی پر کونسلګرۍ د برید د غچ اخیستنې اعلان وکړ، د اسراییل د دفاع وزیر د ایران د ګواښونو په ځواب کې ویلي، چې دوی هر ډول ګواښ او سناریو ته اماده دي.
د اسراييل د دفاع وزير يوف ګالانت وويل؛ هېواد يې خپل چمتووالى زياتوي او د لبنان د حزب الله او نورو هغو سازمانونو پر وړاندې چې اسراييل ته ګواښ پېښوي، خپل عمليات پراخوي.
په ورته وخت کې په دمشق کې د ایران پر کونسلګرۍ له برید وروسته ایران د تهران په ډېپلوماتیکه سیمه کې د پنځو هغو اسراییلي چارواکو انځورونه لګولي وو، چې له مخې یې یاد خلک د دمشق په برید کې ښکېل بلل کیږي.
په دغو بېنرونو کې د اسراییل د دفاع وزیر، د پوځ لوی درستیز او مرستیالان او د اسراییل د هوايي او سمندري ځواکونو قوماندانان شامل دي.
پر یادو بېنرونو د ټوپک د نښې سره دایره موجوده ده او ورسره لیکل شوي: "موږ انتقام اخلو".
په سوریه کې د ایران پر کونسلګرۍ له برید یوه ورځ وروسته د ایران د اسلامي جمهوري دولت مذهبي مشر وویل، چې اسراییل به د دوی د «زړور ولس»له خوا مجازات شي.
سید علي خامنه یي په خپل اېکس کې لیکلي، چې د سپاه د غړو وژل کېدل د ایران لپاره سخت دي.
نوموړي د تېرې سې شنبه په ورځ دغه راز په اېکس کې زیاته کړې، چې محمد رضا زاهدي او محمد هادي حاجي رحیمي د اسراییل له خوا وژل شوي دي.
همدا راز د تېرې چهار شنبې په ورځ د امریکا د بهرنیو چارو وزیر انټوني بلېنکن هم ویلي وو، چې امریکا هڅه کوي په دمشق کې د ایران پر کونسلګرۍ د اسراییل د برید په اړه شواهد تر لاسه کړي.
د طالبانو د ریاست الوزرا د حکم له مخې؛ په لوګر ولایت کې له تازه راستنو شویو کډوالو سره ۶،۵ میلیونه افغانۍ نغدي مرسته شوې؛ خو د سیمې اوسېدونکي وايي، چې مرسته یوازې د راستنو شویو طالب کډوالو سره شوې.
د دغه حکم له مخې؛ د دغو مرستو د وېش لړۍ د دوشنبې په ورځ (د وري ۲۰مه) له پاکستان او ایران څخه د ۵۶۲ راستنو شویو کورنیو لپاره پیل شوې ده.
په لوګر ولایت کې د طالبانو مرستیال والي محمد انور دین پرور له رسنیو سره په خبرو کې ویلي، چې په هرې کورنۍ له لسو څخه تر یوولس زره افغانیو ورکول کیږي.
خو د سیمې اوسېدونکو افغانستان انټرنشنل - پښتو ته ویلي، چې لوګر ته له ایران او پاکستان څخه ګڼ شمېر کډوال راستانه شوي؛ خو طالبانو یوازې له هغو خلکو سره مرسته کړې، کوم چې د طالبانو په لیکو کې غړیتوب ولري.
په ټولنیزو رسنیو کې د دغو مرستو پر وېش نیوکې شوي او د لوګر یو قومي مشر حاجي ملا جان احمدزی په یوه غږیز پیغام کې وايي، چې مرستې د عامو کډوالو لپاره نه وې.
نوموړي زیاته کړې: "عام کډوال لکه چې خېټه نه لري، انسانان نه دي او یا د افغانستان نه دي، ټولې پېسې یوازې د طالبانو کورنیو ته ورکړل شوي او د طالبانو مشران دې باید خبر واوسي".
د احمدزي په وینا؛ دوی به یاده موضوع له نورو طالب چارواکو سره هم شریکه کړي.
دا لومړی ځل نه دی، بلکې له دې وړاندې هم د مرستو د وېش پر بهیر د اوچا سربېره ګڼو نړۍوالو بنسټونو نیوکې کړې وې.
تېره ورځ د طالبانو تر کنټرول لاندې د شهدا او معلولینو وزارت ویلي وو، چې د طالبانو په لیکو کې معلول شويو طالبانو ته به موټرونه اخلي.
د افغانستان د تېر حکومت د ولسمشر لومړي مرستیال او د «زرغون بهیر» مشر امرالله صالح د طالبانو تر واک لاندې د ۱۴۲ فعالو او غيري فعالو الوتکو نوملړ خپور کړ.
دغه بهير ویلي، چې د طالبانو په ۸ نظامي مرکزونو کې ۶۴ فعالې الوتکې او ۷۸ غیر فعالې الوتکې شته.
«زرغون بهير» ادعا کوي، چې طالبان په افغانستان کې د فعالو الوتکو د شمېر په اړه ناسم معلومات ورکوي.
د دغه نوملړ پر بنسټ، چې دې بهير د دوشنبې په ورځ (د وري ۲۰مه) خپور کړ ويلي، چې د کابل، جلال اباد، ګردېز، کندهار، شوراب، هرات، مزارشريف او کندز ولایتونو په نظامي مرکزونو کې ۳۰ ډوله د استفادې او غيري استفادي وړ الوتکي د طالبانو تر واک لاندې دي.
د الوتکو په دې نوملړ کې په هر نظامي مرکز کې د فعالو او غيري فعالو الوتکو شمېر ځانګړی ښودل شوی دی.
«زرغون بهیر» چې په دې وروستیو کې په بېلابېلو ادارو کې د طالبانو د ډلې د غړیو نوملړ خپور کړی او ادعا کوي، چې د طالبانو تر واک لاندې الوتکې د افغانستان د خلکو د ځورولو لپاره کارول کېږي.
د زرغون بهیر استخباراتي څانګې (رسا) د پخواني نظام له پېلوټانو، انجنیرانو او تخنیکي ملاتړو کارکوونکو څخه چې اوس د طالبانو لپاره کار کوي غوښتي، چې د دې ډلې لپاره کار بند کړي.
د دغه بهير په خبرپاڼه کې راغلي: «پېلوټان باید د کوېټې شورا او د میرانشاه د شورا د غړو خدمت ونه کړي او دوی باید د خپلو ملګرو وینه هېره نه کړي.»
«زرغون بهير» ټینګار کړی، چې له دغه جریان سره د افغانستان د پخوانی هوایي ځواک اړيکه له طالبانو ډلې څخه د هغوی د جلا کېدو اساس برابروي.
دې جریان همداراز خبرداری ورکړ: «موږ هيله مند يو چې خبره به هغه ځای ته ونه رسيږي کوم، چې موږ هڅه کوو د طالبانو په خدمت کې پېلوټان او د هوايي ځواک پخواني پرسونل په نښه کړو.»
د امرالله صالح په مشرۍ «زرغون بهير» همدا ډول خبرداری ورکړ، چې د پېلوټانو نومونه او ادرسونه به خپاره کړي.
دوې ورځې مخکي دغه بهير د طالبانو د کورنیو چارو او استخباراتو وزارتونو د چارواکو د نومونو نوملړ خپور کړ او اعلان یې وکړ، چې د دغې ډلې د دفترونو په اړه به نور معلومات هم خپاره کړي.
طالبانو تر اوسه د «زرغون بهير» له لوري د خپرو شویو لېستونو په اړه کومه تبصره نه ده کړې.
د طالبانو تر واک لاندې مرکزي بانک اعلان وکړ، چې هېڅ کس یا شرکت ته یې د انلاین صرافۍ د فعالیت جواز نه دی ورکړی او د دوی فعالیتونه غیر قانوني دي.
دغه بانک په یوې خبرتيا کې له خلکو او شرکتونو غوښتي، چې د انلاین صرافۍ له کاروبار څخه ډډه وکړي.
د طالبانو تر واک لاندي د افغانستان مرکزي بانک د دوشنبې په ورځ (د وري ۲۰مه) د خپلې اېکس پاڼې له لارې په يوې خبرتيا کې خلکو ته خبر ورکړی، چې د انلاین صرافي فعاليتونه غيري قانوني دي او د بنديز موضوع یې د طالبانو له کشفي او امنيتي ادارو سره هم شریکه کړې ده.
بانک خلکو ته په دې خبرتيا کې ليکلي: « له هېوادوالو غواړو، چې د دې ډول معاملاتو د خطرونو او زیانونو په پام کې نيولو سره له انلاین صرافيو سره د معاملاتو له ترسره کولو ډډه وکړي.»
د افغانستان بانک د معلوماتو له مخې؛ که د انلاین صرافۍ د فعالیتونو په تړاو څوک ونيول شي قانوني چلند به ورسره وشي.
تر دې مخکې د طالبانو تر واک لاندې مرکزي بانک ويلي وو، چې په افغانستان کې د بهرنیو اسعارو پر انلاین سوداګرۍ بندیز دی.
په افغانستان کې واک ته د طالبانو په رسېدو د خلکو اقتصادي وضعت ښکته کچې ته رسېدلی او ډېرو خلکو انلاین سوداګرۍ او د ډيجيټل اسعارو ذخيره کولو ته مخه کړې.
