ترکیې د غزې تر اوربنده اسراییل ته د ۵۴ محصولاتو صادرات محدود کړل
د ترکيې د سوداګرۍ وزارت وايي، چې تر هغه به اسراییل ته پر صادراتو بنديز ولګوي؛ تر څو چې اوربند نه وي شوی او په غزه کې بشري مرستې زياتې شوې نه وي.
د ترکيې د سوداګرۍ وزارت وايي، چې تر هغه به اسراییل ته پر صادراتو بنديز ولګوي؛ تر څو چې اوربند نه وي شوی او په غزه کې بشري مرستې زياتې شوې نه وي.
د ترکیې د سوداګرۍ وزارت د سې شنبې په ورځ (د اپریل ۹مه) په یوه بیان کې وویل، چې دوی به نور اسراییل ته په ۵۴ کټګوریو کې د اوسپنې او فولادو محصولات، د جیټ تیل ، ساختماني تجهیزات، ماشینونه، سمنټ، ګرانایټ ، کیمیاوي توکي، افت وژونکی، خښتې او نور توکي نه استوي.
په دغه بیان کې ویل شوي: «دا پرېکړه به تر هغه وخته پورې پر ځای وي چې اسراییل سمدستي اوربند اعلان کړي او غزې ته د بشري مرستو د کافي او بې خنډه لیږد اجازه ورکړي.»
بل خوا؛ د اسراییل د بهرنیو چارو وزیر د ترکیې بندیزونه له اسراییل سره د سوداګریزو تړونونو یو اړخیزه سرغړونه بللې ده.
د اسراییل د بهرنیو چارو وزیر وايي، چې د ترکیې ولسمشر اردوغان د حماس د ملاتړ لپاره د ترکیې اقتصادي ګټې قرباني کوي.
ښاغلي يسراييل کاتس ويلي، چې د ترکيې د بنديزونو په غبرګون کې به د ترکيې پر توليداتو خپل سوداګريز محدوديتونه ولګوي.
د ترکیې د بهرنیو چارو وزیر ویلي، چې هېواد یې غوښتل غزې ته د بشري مرستو په الوتنو کې برخه واخلي؛ خو اسراییل ورسره مخالفت وکړ.
غزې ته د هوایي مرستو د استولو سره د ترکیې له غوښتنې د اسراییل مخالفت په داسې حال کې دی، چې د خوړو نړۍوال سازمان غزه کې د خلکو ناورین ته په اشارې سره وویل، چې د یوه میلیون څخه د ډېرو خلکو د یوې میاشتې خواړه د بندو لارو ترشا پاتې دي.
د اکټوبر له اووم راهیسې کله چې اسراییل پر غزې خپل بې رحمانه بریدونه پیل کړل ترکیه د اسراییل یو له سرسختو منتقیدونو څخه بلل کیږي.
