سرچینو افغانستان انټرنشنل ـ پښتو ته وویل، د طالبانو مشر ملا هبت الله د کوچني اختر په مناسبت د ځانمرګو د قطعې هر غړي ته لس زره افغانۍ اختری ورکړی دی. سرچینې زیاتوي، نوموړي د سترې محکمې قاضیانو، د مرکزي دارالافتا غړو او د جهادي مدرسو مسوولانو ته هم د اختري ور کولو امر کړی.
په کابل کې باخبره سرچینو افغانستان انټرنشنل ـ پښتو د هغو ادارو په اړه معلومات ورکړي، چې د ملا هبت الله د امر له مخې پرې د مالیې وزارت د کوچني اختر په مناسبت د اختر ډالۍ په نامه نغدې پیسې وېشي.
د طالبانو مشر ملا هبت الله دې وزارت ته امر کړی چې د فدایانو قطعې ۳۵۰۰ کسیزه ډلې هر غړي ته د اختر ډالۍ په نوم لس زره افغانۍ ور کړي.
ملا هبت الله دا هم ویلي چې د طالبانو د سترې محکمې او مرکز ي دارالفتا د دوهم او درېیم بستونو مامورینو ته له پنځلس زرو تر شل زرو افغانیو د اختر لپاره نغدي ډالۍ ووېشل شي.
هغه د ټولو جهادي مدرسو مسوولانو او کارمندانو ته ۱۵۰۰۰ اختري ډالۍ غوښتنه کړې ده.
په څلورمه برخه کې نوموړي د طالبانو د علماوو مرکزي او ولایتي شوراګانو هر غړي ته د لس زره افغانۍ اختر ډالۍ د ور کولو امر کړی دی.
د سرچینو د معلوماتو له مخې اختر نغدي ډالۍ کومې امنیتي ادارې او یا هم د ښاروالۍ مسوولانو او مارموینو ته نه دي ورکړل شوې.
د طالبانو مشر ملا هبت الله د خپل دفتر ټولو کارکونکو ته هم د اختري په نوم ۲۰۰۰۰ افغانۍ ورکړې دي.
دوه ورځې وړاندې په کندهار کې د جهادي مدرسو مسولانو او د جوماتونو ملا امامانو د کندهار والي ملا شیرین سره د لیدنې وروسته ددې ډلې د مشر ملا هبت الله لخوا اختري په نوم ۲۰۰۰۰ افغانۍ ډالۍ په توګه ورکړې.
د طالبانو په واکمنېدو سره د دولتي مامورانو تنخا کمه شوې او د ملا هبت الله د دغو نغدي ډالیو په اړه نیوکې دا دي، چې دغه بې وسه مامورین یې په پام کې نه دي نیولي.
دغه تصويرونه د کندهار ښار د «شهيدانو چوک، هرات بازار او چهارسو» د ګڼې ګوڼې له سيمو دي.
ډېری خلک د کوچني اختر په مناسبت د خپلو کورنيو سره تياری نیسي او تر ډېره د اختر مېوې اخلي.
د دې تصویرونو د اخيستلو پر مهال یو شمېر دوکاندارانو افغانستان انټرنشنل – پښتو ته وويل، چې کاروبار يې د نورو کلنو په پرتله کمزوری او خلک د پخوا په څېر توکي نه رانيسي.
دوی يې لامل کمزوری اقتصادي حالت او د يو شمېر خوراکي توکو د بيو لوړوالی يادوي.
ښاريانو له طالبانو څخه د اختر په ورځو کې د امنيت خوندي ساتلو غوښتنه کوله؛ خو طالبان وایي، چې د اختر د نمانځلو لپاره يې امنيتي تدابير زيات کړي دي.
