د ایټالیا ساحلي ګارد ویلي، چې د یوې کښتۍ له ډوبیدو وروسته یې ۲۲ کډوال ژغورلي، خو ښايي ۱۵نور لادرکه وي. د دغه ګارډ د معلومات له مخې، دغه کښتۍ چې کډوال پکې سپاره وو، د چهارشنبې په ورځ د لامپدوزا ټاپو ته نژدې په توپاني هوا کې ډوبه شوې ده.
د ایټالیا ساحلي ګارد وايي، په سیمه کې د خرابې هوا له کبله د ژغورنې عملیات له ننګونو سره مخامخ دي.
د دغې پېښې ژغورل شوي کسان پناه ځایونو ته لېږدول شوي، خو تر اوسه دا نه ده معلومه چې دغه کډوال د کومو هېوادونو وکړي دي.
لامپدوزا، چې د مدیترانې په بحیره کې د تونس او مالټا او د سیسیل لویې ټاپو ترمنځ موقعیت لري، د کډوالو لپاره د اروپا اتحادیې ته د ننوتلو یوه مهمه لاره ده.
د چهارشنبې په ورځ د اروپايي پارلمان استازو د اروپايي ټولنې د پناه غوښتنې او کډوالۍ تړون تصویب کړ. د نویو بدلونونو پر بنسټ، د پناه غوښتونکو د کډوالۍ دوسیې او د هغوی د اېستلو بهیر چټک شوی دی.
