د ایران وسله والو ځواکونو د هرمز په تنګي کې یوه بیړۍ نیولې ده.د اسراییل د پوځ راډیو ویلي، چې دا بیړۍ د یو اسراییلي شرکت پورې اړه لري. د ام اس سي په نوم نیول شوې بیړۍ چې کانټینرونه لیږدوي، مصر ته روانه وه او ۲۰ فلیپیني کارکوونکي په کې سپاره وو.
العربیه رسنۍ د خپلو سرچینو له قوله لیکلي: «ایران په سوریې او لبنان کې د سپاه پاسداران د قومندانانو د وژلو په ځواب کې دغه بیړۍ نیولې ده.»
دغې رسنۍ څو شیبې وروسته دغه خبر چې پر اېکس خپور شوی و، لرې کړی دی.
د ایران او اسراییل شخړې ته په کتو ځینو هېوادونو له خپلو وګړو غوښتي چې ایران، اسراییل او د غزې لویدیځ ته دې سفر نه کوي.
کاناډا او فنلنډ له خپلو وګړو غوښتي چې ایران او اسراییل ته له سفر کولو ډډه وکړي. د کاناډا د بهرنیو چارو وزارت د دغه هېواد وګړو ته خبرداری ورکړی چې اسراییل، غزې او لویدیځې غاړې ته له هر ډول سفر ډډه وکړي.
د فنلند د بهرنیو چارو وزارت هم په یوې اعلامیه کې له خپلو وګړو غوښتي چې ایران ته سفر ونه کړي.
د جرمني د بهرنیو چارو وزارت ویلي، چې په تهران کې د دغه هېواد د سفارت د کارکوونکو کورنۍ په اسراییل د ایران له خوا د برید د ګواښ له امله له ایران څخه وتلي دي.
تر دې مخکې د فرانسې دیپلوماتانو هم په ایران کې د دې هېواد له سفارت څخه وتلي دي.
اتریش هم له خپلو اتباعو غوښتي چې له ایران څخه ووځي.
وروسته له هغه چې د هرمز تنګي کې د اسراییل اړوند د یوې بیړۍ د نیولو خبر خپور شو، د اسراییل د پوځ ویاند خبرداری ورکړ چې «تهران به د کړکېچ د زیاتېدو پایلې وویني.»
دانیل هاګاري وویل: «موږ د ایران له لوري د هر ډول احتمالي برید په وړاندې چمتو یو.
بل خوا دهالنډ کي ال ام هوايي شرکت، د ایران او اسراییل پر اسمانونو خپلې الوتنې تر بلې خبرتیا پورې وځنډولې.
همدا راز، د هالنډ د بهرنیو چارو وزارت څو ساعته مخکې اعلان وکړ چې په تهران کې به د یکشنبې په ورځ خپل سفارت د احتیاطي تدابیرو په موخه وتړي.
د جرمني د هوايي چلند فدرالي ادارې هم هوايي شرکتونو ته خبرداری ورکړی چې په ایران په فضا کې د ملکي الوتکو د ویشتلو احتمال شته.
د ایران او اسراییل تر منځ د کړکېچ له زیاتېدو وروسته د تهران په ازاد بازار کې د یو امریکايي ډالر بیه ۶۶زره تومانو ته رسیدلې ده.
ایراني رسنیو راپور ورکړی چې سپاه پاسداران تایید کړې چې د هرمز تنګي کې یې د پرتګال تر بیرغ لاندې له اسراییل سره تړلې سوداګریزه بیړۍ نیولې ده.
