د طالبانو د سټنډرډ اداره وايي، د شیخ ابو نصر فراهي بندر له لارې یې ۱۹ ټانکره بې کیفیته تېل ایران ته ور ستانه کړل. د طالبانو د سټنډرډ ادارې د دوشنبې په ورځ د (وري ۲۷مه) په خپله اېکس پاڼه لیکلي چې، د شیخ ابو نصر فراهي بندر له لارې یې ۱۹ ټانکره بې کیفیته تېل له پولې ګرځولي.
یاده اداره وايي، د دغو ۱۹ ټانکره تېلو کیفیت د طالبانو د سټنډرډونو سره په ټکر کې و.
دغې ادارې له سوداګرو غوښتي چې افغانستان ته د بې کیفیته نفتي توکو له واردولو څخه ډډه وکړي.
څو ورځې وړاندې ایراني چارواکو پر طالبانو نیوکه کړې وه او ویلي و چې طالبان د سټنډرډونو د معلوملو لپاره مناسب سیسټم نه لري.
خو د وري میاشتي په شلمه د طالبانو د سټنډرډ ادارې د ایراني چارواکو نیوکو ته په غبرګون کې ویلي، د افغانستان په ټولو بندرونو کې یې د نړۍ د پرمختللو کمپنیو د سټنډرډ معلومولو سیسټم لګولی او اجازه نه ورکوي چې هېواد بې کیفیته او ضرر رسوونکي توکي وارد شي.
