په فراه ولایت کې د وروستیو اورښتونو او سېلابونو له امله د دوو ماشومانو په ګډون څلورو کسانو ژوند له لاسه ورکړ او یو بل ټپي شوی دی. په فراه ولایت کې د طبیعي پېښو پروړاندې د طالبانو د مبارزې رییس وایي، چې دغو سېلابونو د ځاني زیانونو ترڅنګ خلکو ته مالي تاوانونه هم اړولي دی.
د طالبانو تر واک لاندې ملي ټلویزیون راپور ورکړی، چې په کندهار ولایت کې هم د سختو اورښتونو او سېلابونو له امله ۱۴۶ کورونه وېجاړ شوي او شاوخوا ۲۴۳ څاروي له منځه تللي دي.
دا په داسې حال کې ده، چې په تېرو دوو ورځو کې د هېواد په بېلابېلو ولایتونو کې د وروستیو اورښتونو او سېلابونو له امله ۶۰ کسانو ته مرګژوبله اوښتې او سلګونه کورونه ویجاړ شوي دي.
پېښو ته د رسېدو په چارو کې د طالبانو د وزارت ویاند وايي ویلي دي، چې د ښځو او ماشومانو په ګډون ۳۳ کسانو ژوند له لاسه ورکړی او ۲۷ نور ټپيان دي.
پېښو ته د رسېدو په چارو کې د طالبانو د وزارت ویاند ملا جانان سایق وایي، چې ددغو سېلابونو له امله د ځاني تلفاتو ترڅنګ مالي تاوانونه هم اوښتي دي.
د نوموړي په خبره، په تېرو څو ورځو کې ۶۰۶ کورونه او شاوخوا ۱۹۵۵ جريبه کرنيزې ځمکې ویجاړې شوې دي.
د یادولو ده، چې په ځینو سیمو کې بیا د غره د ښویېدو او د سړکونو د خرابېدو له امله لارې بندې شوې دي او مسافر بند پاتې دي.
