د طالبانو د کورینو چارو وزارت وايي، د هرات د والي او قزاقستان د سفیر تر منځ د سوداګریزو اسانتیاوو پر زیاتوالي او د دواړو هېوادونو د سوداګرۍ د پراخوالي په اړه خبرې او هوکړه وشوه.
د طالبانو د کورنیو چارو وزارت د دوشنبې په ورځ د (وري ۲۷مه) په خپله اېکس پاڼه لیکلي، چي د هرات د والي مولانا اسلام جار او قزاقستان د سفیر له لوري په هرات ولایت کې د قزاقستان د سوداګرۍ خونه پرانیستل شوه.
د دغه وزارت د معلوماتو له مخې په هرات کې د طالبانو د والي او قزاقستان د سفیر تر منځ د سوداګرو تر منځ تبادلې، د ګمرکي تعرفو د کمولو، د سوداګرو د ستونزو حل او د ویزو د ورکړې په اړه تړون وشو.
په هرات کې د طالبانو سیمه ییزو چارواکو ویلي چې، د قزاقستان د سوداګرۍ خونې په پرانیستلو سره به د دواړو هېوادونو د سوداګرو تر منځ اسانتیاوې او په سوداګریزو راکړو ورکړو کې به زیاتوالی راشي.
