د طالبانو د ترافیکو ریاست له لوري په خپره شوې خبرپاڼه کې ویل شوي چې د اختر په شپو او ورځو کې په ۱۰۲ ترافیکي پېښو کې ۵۰ کسان مړه شوي دي. یاد ریاست وايي، په دغو ترافیکي پېښو کې ۱۸۵ تنه نور ټپیان شوي دي.
د طالبانو د ترافیکو عمومي ریاست د دوشنبې په ورځ د (وري ۲۷مه) د یوې خبرپاڼې په خپرولو سره ویلي چې، د اختر په ورځو کې په ټول هېواد کې ۱۰۲ ترافیکي پېښې رامنځته شوي دي.
د ترافیکو ریاست د معلوماتو له مخې په مړو شویو کې ۲۹ تنه نارینه، ۸ښځې او ۱۳ ماشومان دي.
یاد ریاست په خپره شوې خبرپاڼه کې زیاتوي، چې په ټپیانو کې ۱۱۸ تنه نارینه، ۳۵ ښځې او ماشومان شامل دي.
د موټر او موټرسایکل چلوونکو له لوري د ترافیکي اصولو په پام کې نه نیول، ګړندی تګ او د ماشومانو له لوري د وسایطو چلول د ترافیکو پېښو د رامنځته کېدو لاملونه بلل کیږي.
د طالبانو د ترافیکو عمومي ریاست وايي، هرات د ۱۹، غزني د ۱۱ او پکتیکا د ۱۰ ټرافیکو پېښو په درلودلو سره هغه ولایتونه دې چې ډيرې ټرافیکي پېښې پکې رامنځته شوې دي.
