په دوبۍ کې د سختو بارانونو له کبله الوتنې ځنډېدلې او مساپرو ته سپارښتنه شوې، چې هوايي ډګر ته ور نه شي. د دوبۍ د هوايي ډګر چارواکو ویلي، چې له دوبۍ څخه اماراتو ته د مساپرو الوتنې د خرابې هوا او د سړک د خرابوالي له امله لغوه شوې دي.
د هوایی ډګر چارواکو مساپرو ته سپارښتنه کړې، چې د دوبۍ هوایي ډګر ته دې له راتګه ډډه وکړي.
وروستیو ورښتونو د دوبۍ، شارجه او ابوظبي په ګډون د متحده عربي اماراتو په ښارونو کې د سختو بارانونو ٧٥ کلن ريکارډ مات کړ.
د راپورونو له مخې، په دوبۍ کې دوه کلن باران په څو ساعتونو کې ورېدلی چې سړکونه یې د اوبو په ډنډونو بدل کړي دي.
ورته مهال په دغو ښارونو کې ټرانسپورټي خدمتونه هم په ټپه درېدلي دي.
چارواکو ښوونځیو ته لارښوونه کړې، چې انلاین ټولګي جوړ کړي او کارکوونکي دې له کوره کار وکړي.
د متحده عربي اماراتو د هوا پېژندنې ادارې ویلي، چې د بارانونو ورښت به تر نن ماښامه دوام وکړي.
