د طالبانو د ریاست الوزرا اداري مرستیال وایي، ټول بهر میشتي افغان کادرونه او متخصصین دې بېرته افغانستان ته ستانه شي او د هېواد په ابادۍ او پرمختګ کې دې ونډه واخلي. عبدالسلام حنفي پرون د بهر مېشتو افغانانو له یو شمېر استازو او علمي او فرهنګي شخصیتونو سره په کتنه کې دا خبره کړې ه.
نوموړی وایي: «افغانستان د ټولو افغانانو ګډ کور دی او اسلامي امارت د اداري فساد په له منځه وړلو سره هېوادوالو ته خدمت کوي.»
د طالبانو تر واک لاندې د حکومت د اطلاعاتو او رسنیو مرکز د یوې خبرپاڼې په خپرولو سره د یادو بهر مېشتو شخصیتو له قوله لیکلي، چې د طالبانو په راتګ سره په بېلابېلو برخو په ځانګړي توګه د سوداګرۍ او پانګونې په برخو کې فرصتونه رامنځته شوي دي.
دغواستازو له عبدالسلام حنفي سره په کتنه کې له دغې ډلې وغوښتل، چې د ښوونې او روزنې د کیفیت او کمیت د پیاوړتیا، روغتیا، په ادارو کې د لا زیاتو مسلکي او متخصصو کسانو د ګومارنې او له موجوده اقتصادي ظرفیتونو څخه د استفادې په برخو کې پاملرنه زیاته کړي.
له بهر مېشتو متخصصو افغانانو د ستنېدو غوښتنه په داسې حال کې مطرح کیږي، چې اوس هم زرګونه مسلکي کدرونه د وزګارۍ او ناوړه اقتصادي وضعیت له امله د هېواد د پرېښودو په لټه کې دي.
پر افغانستان د طالبانو له بیا واکمنېدو سره د امنیتي ادارو ډېری جنرالان، د ټیکنالوژۍ برخې متخصصین، انجینران، ډاکټران، خبریالان او د پوهنتونونو سلګونه استادان له افغانستانه ووتل .
اوس طالبان په بېلابېلو ادارو کې د مسلکي کسانو د نشتون له جدي ستونزو سره مخ دي او په ځلونو طالب چارواکو له بهر مېشتو کدرونو غوښتي، چې بېرته هېواد ته ستانه شي.
طالبانو ان له هيواد څخه د وتلو افغانانو د بېرته راغوښتلو لپاره د افغان شخصیتونو سره د اړیکو په نوم یو کمېسیون هم جوړ کړی او ستنېدونکو کسانو ته کارټونه هم ورکوي.
