د روغتیا نړېوال سازمان د افغانستان څانګې ویلي، چې د کابل خیرخانې مېنې په ۱۰۲ بستریز روغتون کې یې د ماشومانو خوارځواکۍ د مخنیوي څانګه جوړه کړې. یاد سازمان وايي، دغه څانګه به په خوارځواکۍ له اخته ماشومانو سره په درملنه کې مرسته وکړي.
د روغتیا نړېوال سازمان د افغانستان څانګې نن پنجشنبه د (وري ۳۰مه) نېټه په ایکس پاڼه لیکلي چې دغه سازمان د کابل ښار خیرخانې مېنې په ۱۰۲ بستریز روغتون کې د خوارځواکه ماشومانو د درملنې لپاره د ۵۰ زرو امریکايي ډالرو په ارزښت یوه څانګه جوړه کړې.
دغه سازمان وايي، د خوارځواکۍ د درملنې په دغه مرکز کې یې د درملو، شیدو او لازمو تجهیزاتو په برابرولو سره هڅه داده چې په خوارځواکۍ اخته ماشومان ورغوي او میندو ته د مشورو له لارې به د نورو ماشومانو د اخته کیدو مخه ونیسي.
د روغتیا نړیوال سازمان تر دې وړاندې ویلي و، چې له تېر سپټمبر راهیسې یې د افغانستان په ۱۵ ولایتونو کې له ۲۵ روغتونونو سره د څه باندې ۴،۴ میلیون ډالرو په ارزښت د طبي توکو او درملو مرسته کړې ده.
دغه سازمان ویلي و، یادې مرستې به د ښځو او ماشومانو روغتیايي ستونزې کمې او د مړېنې کچه راټيټه کړي.
دغه سازمان وايي، چې د دوی مرستې به په روغتونونو کې ۳،۵ میلیون خلکو ته د خدمت جوګه شي.
روغتیا نړېوال سازمان وايي چې په افغانستان کې په ۱۲۵۰۰۰ ماشومانو کې د سختې خوارځواکۍ اغېزې لیدل شوې او په دغه هېواد کې له ۲.۳ میلیونو څخه زیات ماشومان ښايي د منځنۍ کچې په خوارځواکۍ اخته وي.
د بې پولې ډاکټرانو ټولنې وړاندې په یوه راپور کې ويلي و، چې د طالبانو له خوا د بې کفایته نظام، اقتصادي ځوړ او د طالبانو له لوري لګول شوي بندیزونه په افغانستان کې د بشري ناورین د رامنځ ته کېدو لامل شوي.
