د پاکستان د بهرنیو چارو وزیر اسحاق ډار د طالبانو د بهرنیو چارو وزیر امیر خان متقي ته اسلام اباد ته د سفر بلنه ورکړه. د پاکستان د بهرنیو چارو وزارت وايي، ښاغلي ډار امیر خان متقي ته په ټیلیفوني خبرو کې دا هم ویلي، چې په مناسب وخت کې کابل ته د تګ پلان لري.
د پاکستان د بهرنیو چارو وزارت وايي، چې د چهارشنبې په ورځ امیرخان متقي له اسحاق ډار سره په ټیلیفوني اړیکه کې د بهرنیو چارو د وزارت په څوکۍ ټاکل کېدو مبارکي ورکړې ده.
له هغه وخت راهیسې چې طالبانو په ۱۴۰۰ کال کې افغانستان نیولی، اسلام اباد څو ځلې د طالب چارواکو کوربه توب کړی دی. پاکستاني چارواکي هم څو ځله کابل ته تللي چې پر بېلابېلو مسایلو خبرې وکړي.
که څه هم اسلام اباد په رسمي ډول د طالبانو ډله د حکومت په توګه په رسمیت نه ده پېژندلې، خو په نړیوالو سازمانونو او په ځانګړي توګه ملګرو ملتونو کې یې د دې ډلې څخه خپل ملاتړ اعلان کړی دی.
د افغانستان د اسلامي جمهوریت له سقوط وروسته د پاکستان لوړ پوړو چارواکو په لویه کچه د طالبانو د بریا په اړه خوشبیني څرګنده کړه. خو د وخت په تیریدو سره دغه خوشبیني پر طالبانو په سختو نیوکو بدله شوه.
لوړ پوړي پاکستاني چارواکي د اورپکو ډلو په ځانګړې توګه د تحریک طالبان پاکستان د بریدونو د زیاتوالي پړه پر طالبانو اچوي.
اسلام اباد په وار وار له طالبانو غوښتي چې یاغیان دې پرې نه ږدي، چې د افغانستان خاوره د پاکستان پر ضد وکاروي. خو د اسلام اباد د نیوکو په ځواب کې طالبانو ویلي، چې پاکستان غواړي د امنیت په برخه کې د خپلې ناکامۍ پړه پر کابل واچوي.
