په پنجشېر کې د طالبانو د والي دفتر وايي، د چين ځینې سوداګريز شرکتونه غواړي د دې ولایت د کانونو په بېلابېلو برخو کې پانګونه وکړي. دغه دفتر نن په يوه اعلامیه کې ویلي، چينایي سوداګرو د دې ولايت لپاره د طالبانو له والي حافظ محمد اغا حکیم سره په لیدنه کې دا لېوالتیا ښودلې ده.
ګه څه هم د چينايي سوداګرو شمېر ته اشاره نه ده شوې، خو زیاتوي چې دې پانګوالو، له پنجشېر څخه تر کابله د اوبو د لېږد په پروژه کې هم پانګونې ته ليوالتیا ښودلې ده.
د طالبانو د پنجشېر والي محمد اغا حکيم د چينایي سوداګرو د لېوالتيا هرکلی کړی او ټينګار يې کړی او نورو کورنيو او بهرنيو پانګوالو ته یې هم د پانګونې بلنې ورکړې ده.
د پنجشېر د طالبانو د والي دفتر په اعلاميه کې راغلي، چې دامهال په دې ولایت کې تر ۵۰۰ زياتو کانونو د استخراج چارې روانې دي.
اعلاميه زياتو، چې په تېرو څو مياشتو کې پر چينایي سوداګرو سربېره د ایران، فرانسې او امريکا د نړیوالو سوداګريزو شرکتونو مسولينو هم په پنجشېر کې د طالبانو له مسولينو سره په ليدنو کې د کانونو په برخه کې پانګونې ته زړه ښه کړی دی.
طالبانو په بیا واکمنېدو سره د پنجشېر په ګډون د افغانستان په مختلفو ولایتونو کې د کانونو سپړلو ته مخه کړه.
د جنورۍ په لومړیو کې د طالبانو د کانونو او پټرولیم وزارت چارسمبالي وزیر شهاب الدین دلاور په يوه غونډه کې ويلي و، چې په پنجشېر کې د زمردو ۱۷۰۰ کانونه پېژندل شوي چې له دې ډلې ۴۵۰ یې د ملاهبت الله په ځانګړي فرمان د دغه ولایت خلکو ته ورکړل شوي دي.
خو د همدې وزارت ویاند همایون افغان دوه اونۍ مخکې وویل، د افغانستان په بېلا-بېلو سېمو کې د ۲۰۰ کوچنيو او ۱۵ لويو کانونو د استخراج چارې روانې د کورنيو او بهرنیو شرکتونو له خوا روانې دي.
