د طالبانو د کابل د امنيې قوماندانۍ وياند د کابل ښار په لوېديځ کې شوې چاودنه تاييد کړې او ویلي، چې په دغه چاودنه کې يو تن وژل شوى او درې نور ټپيان دي.
خالد ځدراڼ وايي، دا پېښه په یوه مسافر وړونکي موټر کې د مقناطیسي ماین د چاودنې له امله رامنځته شوې ده.
دغه طالب چارواکي رسنیو ته ویلي، چې دا پېښه د کابل ښار د درېیمې امنیتي حوزې اړوند د کوټه سنګي په سیمه کې شوې او مقناطیسي بم په یوه ښاري مسافر وړونکي موټر کې ځای پر ځای شوی و.
تر دې مخکې د کابل په لویدیځ کې اوسیدونکو په سیمه کې د یوې درنې چاودنې خبر ورکړی و. عیني شاهدانو په ټولنیزو رسنیو کې په ویډیوګانو کې ویلي، چې طالبانو هغه کسان وهلي چې له پېښې یې ویډیو اخیسته.
تر اوسه د دې برید مسوولیت کومې ډلې په غاړه نه دی اخیستی.
ځینو سرچینو ویلي، چې په دې پېښه کې لږ تر لږه درې کسان وژل شوي دي.
دپوليسو وياند ویلي، چې پيښه کې د دغه موټر چلوونکى وژل شوى او درې تنه ملکي وګړي ټپيان شوي دي . هغه ویلي، چې طالبان د پيښې سیمې ته رسیدلي او د چاودنې په اړه پلټنې روانې دي.
تر دې مخکې د کابل په لوېدیځ کې اوسېدونکو افغانستان انټرنشنل ته ویلي وو، چې ماښام شاو خوا اوه بجې په ګولایي دواخانه سیمه کې چاودنه شوې ده.
یوه عیني شاهد افغانستان انټرنشنل ته وویل، چې هغه لږ تر لږه درې کسان ولیدل چې له چاودنې وروسته په سړک کې پراته وو.