ځايي سرچینو افغانستان انټرنشنل ـ پښتو ته وویل، چې په کندهار کې د طالبانو والي ملا شیرین یوې امنیتي غونډې ته سپارښتنه کړې ده، چې په دغه ولایت کې د پخوانیو نظامیانو کورونه او کاروبارونه ثبت کړي. په دغه امنیتي ناسته کې د ښار د امنیت لپاره د لازیاتو تابیاو په اړه پرېکړې شوې دي.
په کندهار ولایت کې د طالبانو د مقام رسنیز دفتر د دوشنبې په ورځ د ( غوايي ۳مه) د یوې خبرپاڼې په خپرولو سره په دغه ولایت کې د طالبانو د والي ملا شیرین په مشرۍ د کندهار امنیه قوماندان او د کندهار ښار د حوزو امرینو په کډون امنیتي غونډه تایید کړې ده.
د طالبانو خبرباڼه کې یوازې د ملا شیرین په حواله لیکل شوي « دا چې موږ له دوښمن سره پوره شل کاله مبارزه وکړه او اخر مو له شرمناکې ماتې سره مخ کړل او همغه دوښمن اوس هم زموږ سره په نورو ډولونو جګړه مخته وړي؛ نو تاسې باید ټول خپلو مسولیتونو ته متوجه اوسئ او سپارل شوي مسولیتونه د توان تر کچې پورې په ښه توګه ادا کړئ.»
افغانستان انټرنشنل ـ پښتو د طالبانو د دې امینتي غونډې جزییات ترلاسه کړي دي
په کندهار کې د طالبانو امنیتي غونډه کې لومړۍ پرېکړه دا شوې، چې د کندهار استخباراتو ریاست او امنیه قوماندانۍ د تروریزم پر وړاندې د مبارزې مدیریت سره په همغږۍ د پخوانیو نظامیانو کورونه او د هغوی اوسني کاروبارونه ثبت کړي.
دویمه پرېکړه دا شوې، چې کندهار ته له پاکستان څخه نوي راکډه شوي کورنۍ ثبت او د هغوی له ځايي مشرانو څخه تضمین واخېستل شي.
درېیمه پرېکړه دا شوې، چې د کندهار ښار له مرکزي ناحیو څخه تر اطرافو پورې چاڼیز عملیات پیل شي.
څلورمه پرېکړه دا شوې، چې د بدې پېښې د مخنیوي لپاره د ښار په مرکزي او څنډو کې تلاشۍ زیاتې شي او پنځمه اخري پرېکړه دا شوې، چې د ښار په څنډو کې رسمي او غیر رسمي راغلو لارو کې امنیتي پوستې زیاتې شي او د مشکوکو موټرو او اشخاصو د څارنې سپارښتنه هم شوې ده.
کندهار د طالبانو د سیاسي قدرت مرکز ګڼل کیږي او ددې ډلې مشر په کندهار کې مېشت دی او له دغه ولایت څخه پر افغانستان واکمني کوي.
د روژې په میاشت کې د داعش له لخوا د نوی کابل بانک پروړاندې ځانمرګي برید کې شاوخوا ۵۰ تنه ووژل شول او ۵۳ تنه نور ټپیان شول.
له دې برید وروسته د کندهار ښار د امنیتي وضعیت په اړه د طالبانو اندېښنې زیاتې شوې دي.
