د چهارشنبې په ورځ د جرمني فېډرالي څارنوالۍ اووه بهرني اتباع چې له داعش - خراسان ډلې سره په تماس کې وو، په جرمني او لویدیځه اروپا کې د ترهګریزو بریدونو په پلانولو تورن کړل.
تورن کسان د ترکمنستان، تاجکستان او قرغزستان اتباع دي او دوه کاله وړاندې له اوکراین څخه جرمني ته داخل شوي وو.
په تورنو کسانو کې د ترکمنستان تبعه عطاء الف، د تاجکستان اتباع محمد شجاع الف، نورالدین ک، شمشاد ن، سعید س، رباني زاو د قرغزستان تبعه ابرارجان ک شامل دي، چې د یو ترهګریز سازمان په جوړولو هم تورن دي.
د جرمني د فېډرالي ادارې د بیان له مخې تورنو کسانو پلان درلود چې په جرمني او لویدیځه اروپا کې پراخ بریدونه ترسره کړي؛ خو کوم مشخص پلان یې نه درلود.
دغه شکمن کسان، چې د تېر کال په جولای کې نیول شوي وو، له داعش خراسان سره یې اړیکې درلودې، چې په مسکو کې د تېرې میاشتې خونړي برید مسوولیت یې منلی و، چې لږ تر لږه ۱۳۷ کسان یې ووژل.
د پلټونکو په وینا؛ د ۲۰۲۲ کال په پسرلي کې د روسیې او اوکراین تر منځ د جګړې له پیل وروسته، شکمن کسان د اوکراین له لارې جرمني ته ننوتل او د داعش له یوه بل هالنډي غړي سره یې په ګډه یوه ترهګره ډله جوړه کړه.
په بیان کې ویل شوي چې دوی په منظمه توګه سره لیدل ترڅو د خپلو پلانونو په اړه بحث وکړي او په جرمني کې د بریدونو احتمالي ځایونه وڅیړي.
