د طالبانو حکومت کې باخبره سرچېنو افغانستان انټرنشنل- پښتو ته وویل، د دې ډلې د مالیې وزارت په ګډون ځینې افغان سوداګرو غزې ته مرستې لېږلې دي.
سرچینې زیاتوي دغه مرستې د متحده عربي اماراتو په مرسته د هوا له لارې غزې ته انتقال شوې او طالبان غواړي، په راتلونکي کې هم ورته مرستې وکړي.
د طالبانو سرچېنو د دغو مرستو د رسېدلو او د غزې پر بې ځایه شوو ماشومانو د وېشلو انځورونه او ویډیو هم افغانستان انټرنشنل - پښتو ته ورکړې ده.
دا مرستې په شنو پلاستکي کڅوړو کې اچول شوې وې، چې پرې د یو افغان سوداګر استاد عبدالحلیم نوم لیکل شوی او د طالبانو د حکومت نښان او بیرغ ورباندې لیدل کیږي.
طالبانو دغه سوداګر د افغانستان «اهل خیر» هېوادوال په لقب یاد کړی دی.
افغانستان انټرنشنل د معلوماتو مخې په دغو مرستو کي د افغانستان د مالې وزارت او يو شمېر مخکښو تجارانو شاوخوا دوه ميليونه افغانۍ نغده مرسته شوې وه.
دا لومړی څل دی، چې له افغانستان غزې ته مرسته شوې ده.
معلوماتو زیاتوي طالبان به له افغانستان څخه نوري اضافي مالي مرستي د متحده عربي امارات لخوا د مرستو د هوايي رسولو لړۍ کې غزې ته واستوي.
د اسراییل پر جنوب د حماس د اکتوبر د اومې په برید پسې تل ابیب پر غزه برید کړی چې لا هم روان دی.
د اسراییل د بریدونو په پایله کې تر اوسه ۳۴ زره ۱۸۳ کسان وژل شوي او ۷۷ زره ۱۴۳ کسان ژوبل شوي دي، چې ډېری یې ښځې او ماشومان دي.