د طالبانو سترې محکمې د یوې خبرباڼې خپرولو سره ویلي، چې په پنجشیر ولایت کې دوه کسان د زنا په تور په عام محضر کې په درو ووهل شول. په خبرپاڼه کې د یادو کسانو د هویت په اړه څه نه دي ویل شوي.
د طالباتو سترې محکمې د یکشنبې په ورځ (د غویي ۱۶مه) د یوې خبرپاڼې په خپرولو سره ویلي، چې هر یو تورن په ۳۹ درې وهل شوی دی.
دا په داسې حال کې ده، چې طالبانو تېره ورځ په پکتیکا او جوزجان ولایتونو او دغه راز تېره اونۍ په خوست کې شپږ کسان په عام محضر کې په درو وهلي دي.پر افغانستان د طالبانو له واکمنۍ وروسته په ټول هېواد کې په عام محضر کې د خلکو مجازات زیات شوي دي او ان په یو شمېر ولایتونو کې اعدامونه هم په عام محضر کې شوي دي.دا په داسې حال کې ده، چې یوناما څو ورځې وړاندې د یوه راپور په خپرولو سره وویل، چې د طالبانو له لوري لږ تر لږه هره اونۍ په یوه ولایت کې په عام محضر کې خلکو ته بدني سزا ورکول کېږي.یوناما په دغه راپور کې ویلي، چې لا هم په افغانستان کې بشري حقونه په بشپړه توګه نه دي تامین شوي.له دې سره؛ طالبان بیا وایي، چې په افغانستان کې د ښځو او نارینهو ټول شرعي حقونه تامین شوي دي.
