د افغانستان د خبریالانو مرکز له طالبانو غوښتي، چې د ملي ټلویزیون خبریال ندا محمد نوري له قید او شرط پرته خوشې کړي. دغه مرکز په یوه بیان کې لیکلي، چې دغه خبریال له درېیو ورځو راهیسې په پروان کې د طالبانو د استخباراتو له خوا تر پوښتنو ګروېږنو لاندې دی.
د افغانستان د خبریالانو مرکز د دوشنبې په ورځ (د غويي۱۷مه) په خپله خبرپاڼه کې د طالبانو له خوا د یاد خبریال نیول د اندېښنې وړ بللی دی.
د ندا محمد نوري کورنۍ د یکشنبې په ورځ ازادۍ راډیو ته ویلي، چې طالبانو دغه خبریال د غويي په ۱۵مه د شنبې په ورځ په چاریکارو ښار کې نیولی دی.
د افغان خبریالانو مرکز په پروان کې د سیمه ییزو سرچینو له خولې لیکلي، چې ښاغلی نوري د "جلا وطن رسنیو سره د همکارۍ" په تور نیول شوی دی.
دغه مرکز په پروان کې له طالب چارواکو وغوښتل، چې ندا محمد نوري دې د رسنیو له قانون سره سم ژر تر ژره خوشې کړي.
ندا محمد نوري په پروان ولايت کې د ملي راډيو ټلويزيون له خبريالانو څخه دى او له څه د پاسه يوې نيمې لسيزې راهیسې په دې رسنيو کې د خبريال او پروډيوسر په توګه کار کړى دى.
د افغانستان د خبريالانو د مرکز وروستۍ موندنې ښيي، چې طالبانو په تېرو دولسو مياشتو کې ٦٤ خبريالان نيولي او له دې ډلې درې خبريالان لا هم د دغې ډلې په بندخونو کې دي.
