د طالبانو ماليې وزارت ویاند وايي، چې په تېر ۱۴۰۲ کال کې يې د ۸ ولايتونو په ګمرونو کې شاوخوا ۱۷۹ زره ټنه بې کيفيته او منع شوي قاچاقي توکي نيولي دي. احمدولي حقل زياتوي، چې په دې توکو کې زراعتي او يوناني درمل، خوراکي توکي او نشه يي مواد شامل دي.
د طالبانو د ماليې وزارت ویاند احمدولي حقمل د دوشنبې په ورځ په يوه ويډيو مرکه کې د تېر ۱۴۰۲ کال د قاچاقي نيول شويو توکو اړوند معلومات شريک کړي.
حقمل زياتوي، چې د دوی د ګمرکونو لوی رياست کارکوونکو، په کندهار، نيمروز، فراه، خوست، پکتيا، هرات، هلمند او ننګرهار ولایتونو کې (یولک ۷۸ زره ۱۹۴) ټنه بې کيفيته او منع شوي توکي نيولي دي.
نوموړی وايي، چې دغه توکي له ګاونډيو هېوادونو په خاص ډول پاکستان څخه په غیر رسمي لارو راوړل کېدل.
هغه زياتوي، چې په لویو لارو او ګمرونو کې يې څارنه روانه ده: « هيچا ته اجازه نه ورکوو، چې قاچاقي او منع شوي توکي په ځانګړې توګه هغه څه چې د کورني صنعت د ودې او پرمختګ د مخنيوي سبب ګرځي لېږد رالېږد شي.»
د طالب دغه ویاند په خبره، چې په ګمرکونو کې د اسانتياو د رامنځته کولو سره يې په ډېرو برخو کې د فساد مخه نيولې.
هغه د دې توکو په تړاو د نيولو شويو کسانو او ادرسونو په اړه جزيیات نه دي شريک کړي.
طالبان پر داسې مهال په ګمرکونو کې د اسانتياو د رامنځته کېدو خبر ورکوي، چې ډېر سوداګر په ولايتي ګمرکونو کې د ستونزو یادونه کوي.
یو شمېر سوداګر لوړه ماليه، د توکو د محصولاتو پر مهال د ګمرک پېچلی سیسټم، د کار کوونکو کمزوری کار، په ګمرکونو کې د لابراتوار او سړو خونو د نشتوالي ترڅنګ ډېرې نورې ستونزې بيانوي.
