د طالبانو سترې محکمې په پکتیا کې درې تنه د "بې عزتۍ"، "غلا" او "توهین" په تور په بند محکوم کړل. دغې محکمې ویلي، چې دوه تنه په ۳۰ درو او درېیم کس په ۲۰ درو محکوم شوي دي؛ خو طالبانو په خبرپاڼه کې څرګنده کړې نه ده، چې دغو کسانو چا ته سپکاوی کړی دی.
د دغې محکمې د خبرپاڼې پر بنسټ؛ دغه حکم د دوشنبې په ورځ (د غويي۱۷مه) د پکتیا ولایت د احمد ابا ولسوالۍ ابتداییه محکمې صادر کړ.
د طالبانو سترې محکمې لیکلي، چې له دغو کسانو څخه دوه یې په یو کال او درېیم کس یې په یو کال او شپږ میاشتې بند محکوم کړل.
د طالبانو منتقدین وايي، دې ډلې له درېیو کلونو راهیسې خپل مخالفین په بېلابېلو تورونو نیولي، بندیان کړي او محاکمه کړي دي.
تېره مياشت د دې ډلې سترې محکمې په کندهار کې درې تنه د خپلو سياسي فعاليتونو په تور په اوږدمهاله بند او په درو وهلو محکوم کړل.
طالبانو د واک تر لاسه کولو وروسته عامه سزا بیا پیل کړه او تر دې دمه یې په ټول افغانستان کې لسګونه کسان په بېلابېلو تورونو په عام محضر کې په درو وهلي دي.
