امریکا د جمعې په ورځ د غزې په جګړه کې د اسراییل لهخوا د امریکایي وسلو د احتمالي کارولو په اړه نیوکه وکړه. د امریکا د بهرنیو چارو وزارت د یوه راپور په خپرولو سره ویلي، چې اسراییل په غزه کې د امریکایي وسلې په کارولو له بشري قانونه سرغړونه کړې.
امریکا وایي، چې دا د "ارزونې وړ" ده چې اسراییل د اووه میاشتنۍ شخړې په لړ کې د نړۍوال بشري قانون سره په تضاد کې وسلې کارولې دي.
د دواړو متحدینو ترمنځ اړیکې د اونۍ په پیل کې وروسته له هغې خړې پړې شوې، چې د متحده ایالاتو ولسمشر جو بایډن ګواښ وکړ که چیرې اسراییل پر رفح په بشپړ ډول برید ته دوام ورکړي؛ نو دغه هېواد ته د وسلو لېږد به ودروي.
د ملګرو ملتونو سرمنشي انتونیو ګوترش د جمعې په ورځ وویل، که اسراییل په رفح پراخه ځمکني عملیات پیل کړي غزه به د "ستر بشري ناورین" له ګواښ سره مخ شي.
په همدې حال کې فرانسې هم له اسراییله وغوښتل، چې پرته له ځنډه په رفح کې خپل عملیات ودروي.
د اسراییل لومړي وزیر بنیامین نتنیاهو یې هم په ځواب کې ویلي، چې هېڅ ډول فشار به دوی له خپل هېواده له دفاع را ونه ګرځوي.
هغه زیاته کړه: "موږ به یوازې ودرېږو."
له بل پلوه د فلسطیني کډوالو لپاره د ملګرو ملتونو د ادارې په وینا، له هغه وخت راهیسې چې اسراییل د رفح ختیځ ته پوځي پرمختګ پیل کړی او پر ښار یې بریدونه زیات کړي، شاوخوا ۱۱۰ زره فلسطینیان له دغې سیمې تښتېدلي دي.
دغې ادارې زیاته کړه، دوی چې هرچیرې ځي د اسراییل د بریدونو له دوامدار ګواښ سره مخامخېږي.
دغې ادارې په اېکس پاڼه لیکلي:« د غزې په تړانګه کې هیڅ ځای خوندي نه دی او د ژوند شرایط خورا ناوړه دي.»
