په اسلام اباد کې یوې محکمې اصف علي زرداري ته د فساد په دوو دوسیو کې قضايي مصونیت ورکړ

امریکا وایي، چې دا د "ارزونې وړ" ده چې اسراییل د اووه میاشتنۍ شخړې په لړ کې د نړۍوال بشري قانون سره په تضاد کې وسلې کارولې دي.
د دواړو متحدینو ترمنځ اړیکې د اونۍ په پیل کې وروسته له هغې خړې پړې شوې، چې د متحده ایالاتو ولسمشر جو بایډن ګواښ وکړ که چیرې اسراییل پر رفح په بشپړ ډول برید ته دوام ورکړي؛ نو دغه هېواد ته د وسلو لېږد به ودروي.
د ملګرو ملتونو سرمنشي انتونیو ګوترش د جمعې په ورځ وویل، که اسراییل په رفح پراخه ځمکني عملیات پیل کړي غزه به د "ستر بشري ناورین" له ګواښ سره مخ شي.
په همدې حال کې فرانسې هم له اسراییله وغوښتل، چې پرته له ځنډه په رفح کې خپل عملیات ودروي.

د اسراییل لومړي وزیر بنیامین نتنیاهو یې هم په ځواب کې ویلي، چې هېڅ ډول فشار به دوی له خپل هېواده له دفاع را ونه ګرځوي.

هغه زیاته کړه: "موږ به یوازې ودرېږو."

له بل پلوه د فلسطیني کډوالو لپاره د ملګرو ملتونو د ادارې په وینا، له هغه وخت راهیسې چې اسراییل د رفح ختیځ ته پوځي پرمختګ پیل کړی او پر ښار یې بریدونه زیات کړي، شاوخوا ۱۱۰ زره فلسطینیان له دغې سیمې تښتېدلي دي.

دغې ادارې زیاته کړه، دوی چې هرچیرې ځي د اسراییل د بریدونو له دوامدار ګواښ سره مخامخېږي.
دغې ادارې په اېکس پاڼه لیکلي:« د غزې په تړانګه کې هیڅ ځای خوندي نه دی او د ژوند شرایط خورا ناوړه دي.»

د عمومي اسامبلې د ۱۹۳غړو رایه، په ملګرو ملتونو کې د بشپړ غړیتوب د ترلاسه کولو په اړه، د نړۍوالې ټول پوښتنې په توګه ارزول شوې چې په عملي توګه یو خپلواک فلسطیني دولت په رسمیت پیژني.

تېره میاشت امریکا د ملګرو ملتونو په امنیت شورا کې د فلسطین د غړیتوب په اړه رای اچونه ویټو کړه.

عمومي اسامبلې د ١٤٣ موافقو او د امریکا او اسراییل په ګډون د ٩ مخالفو رايو سره دغه پرېکړه ليک تصويب کړ. ۲۵هېوادونو هم ممتنع رایه ورکړه.

د عمومي اسامبلې پرېکړه لیک چې د جمعې په ورځ تصویب شو د ۲۰۲۴کال د سپټمبر له میاشتې فلسطینیانو ته د اسمبلې په سالون کې د دې سازمان د غړو هېوادونو تر منځ د یوې څوکۍ په ګډون زیات حقونه او امتیازات ورکوي، خو دوی ته به د رای ورکولو حق نه ورکول کیږي.

په ملګرو ملتونو کې د فلسطین سفیر ریاض منصور په مجلس کې له رای ورکولو مخکې وویل: "موږ سوله غواړو، موږ ازادي غواړو. مثبته رایه د فلسطین د شتون لپاره رایه ده، دا د هېڅ هېواد پر ضد نه ده او دا کار د سولې لپاره پانګه اچونه.»

د ملګرو ملتونو د بنسټ ایښودونکي منشور له مخې، د «سولې خوښونکو هېوادونو» د غړیتوب لپاره چې په دې سند کې موجود مسولیتونه ومني او د پلي کولو توان او لیوالتیا لري، رای اچونه ازاده دي.

په ملګرو ملتونو کې د اسراييل سفير ګيلاد اردان د خپلې وينا پر مهال د سازمان د منشور يوه کاپي څیرې او د "شرم پر تاسو" په شعار سره يې ټوټه ټوټه کړه.

په ملګرو ملتونو کې د بشپړ غړیتوب غوښتنه باید لومړی د امنیت شورا د ۱۵ غړو او بیا د عمومي اسامبلې له خوا تصویب شي. که چیرې دا اقدام د شورا له خوا بیا رایه اچونې ته وړاندې شي ، نو احتمال شته چې یو ځل بیا د متحده ایالاتو له خوا ویټو شي.

په ملګرو ملتونو کې د امریکا مرستیال سفیر رابرټ ووډ د عمومي اسامبلې له رای ورکولو وروسته وویل چې په ملګرو ملتونو کې یو اړخیز اقدامات به د دوه دولتونو حل لاره له ستونزو سره مخامخ کړي.

هغه وويل: "زموږ رايه د فلسطيني دولت له جوړېدو سره مخالفت نه ښيي؛ موږ په څرګنده ويلي، چې موږ يې ملاتړ کوو او د هغه د پرمختګ غوښتونکي يوو. خو دا هم وایوو چې د یو هېواد جوړیدل د اړخونو تر منځ د مستقیمو خبرو اترو له لارې کیدای شي.

فلسطینیان غواړي په لویدیځه غاړه، ختیځ بیت المقدس او د غزې په تړانګه کې یو دولت جوړ کړي. هغه سیمې چې د ۱۹۶۷کال جګړې کې اسراییل نیولي دي.

همدا راز، په ملګرو ملتونو کې د اسراییل سفیر د دوشنبې په ورځ وویل، که عمومي اسامبلې پرېکړه لیک تصویب کړي، نو تمه لري چې واشنګټن به د ملګرو ملتونو او ادارو سره یې مالي مرستې بندې کړي.

په ۲۰۱۱ کې، متحده ایالاتو د ملګرو ملتونو سازمان کلتوري اژانس، یونیسکو، بودجه وروسته له هغه بنده کړې وه، چې فلسطین د دغه سازمان غړیتوب ترلاسه کړی و.

د پنجشنبې په ورځ، د متحده ایالاتو ۲۵جمهوري غوښتونکو سناتورانو د بندیزونه د سختولو لپاره یوه لایحه وړاندې کړه چې له مخې به یې په هر هغه ارګان چې فلسطینیانو ته حقوق او امتیازات ورکوي، د امریکا مالي مرستې به پرې بندې شي.

په شمالي وزیرستان کې ځايي سرچېنو افغانستان انټرنشنل - پښتو ته پرون (پنجشنبه د غویي ۲۰مه) ویلي و، چې دغه د نجونو ښوونځی یواځینی خصوصي ښوونځی و چې د شیوې په سیمه کې جوړ شوی و.

محمد شهباز شریف په یوه اعلامیه کې د دې برید د عاملینو د ژر تر ژره پېژندلو او د قانون منګولو ته د سپارلو لارښوونه کړې ده.

ښاغلي شریف په دغه اعلامیه کې ویلي، چې د دې ښوونځي ویجاړې شوې برخې دې ژر تر ژره په دولتي لګښت ورغول شي.

ښاغلي شریف زیاته کړه: «د نجونو د زده کړې په لاره کې د خنډونو رامنځ ته کولو لپاره د ترهګرو ناوړه طرحې به بريالي نه شي. څوک چې د نجونو د تعلیم مخه ونیسي د قانون منګلو ته به سپارل کیږي.»

هغه زیاته کړه، چې دولت د پاکستان نجونو ته د تعلیم او پرمختګ لپاره په خپل ټول توان کار کوي.

د خیبر پښتونخوا په ډېریو سیمو کې د تاوتریخوالي د پېښو د زیاتېدو سره په دغو سیمو کې ښوونځي په تېره بیا د نجونو ښوونځي له سختو ګواښونو سره مخامخ شوي دي.

په خپل حکم کې، ولادیمیر زیلینسکي د لوړپوړو چارواکو د امنیت د ادارې د مشر سرګي لیونیدوویچ د ګوښه کولو دلیل او راتلونکې دنده یې نه ده روښانه کړې.

د اوکراین د استخباراتو ادارې «اس بي یو» له دې پرېکړې دوه ورځې مخکې ویلي و، چې د ولادیمیر زلنسکي د وژلو لپاره یې د روسیې دسیسه شنډ کړې ده.

همدا راز، دغه سازمان د اوکراین د جګپوړو چارواکو د امنیت ادارې دوه افسران د روسیې امنیتي خدماتو ادارې ته د معلوماتو د ورکولو په تور نیولي وو.

سرګي لیونیدو ویچ له ۲۰۱۹کال راهیسې د اوکراین د لوړپوړو چارواکو د امنیت د ادارې مشر و. نوموړی تر دې مخکې د ولسمشر د شخصي امنیت د ساتنې مسوول و.

ویل شوي چې د روسیې او اوکراین د جګړې له پیل راهیسې د ولادیمیر زلنسکي د وژلو پلانونه په کراتو شڼډ شوي دي.

د مارچ په لومړیو کې، ولسمشر زلنسکي یوې ایټالیوۍ رسنۍ ته وویل: «امنیتي چارواکي وايي، چې تر اوسه یې زما د وژلو لس هڅې شنډې کړي دي.»

ویل شوي، چې له دوو نیول شویو افسرانو څخه یو یې د اوکراین پر ولسمشر او لوړپوړو چارواکو د برید لپاره توغندي او ماینونه برابر کړي وو.

دا په داسې حال کې ده چې پر اوکراین د روسیې له یرغل څه باندې دوه کاله تېریږي او د دغه هېواد ولسمشر تل د وسلو او پوځي تجهیزاتو د کمښت خبره کوي.

د اوکراین دفاع وزارت وویل، چې په سرحدي سیمو کې د جګړې په سختېدو سره یې هلته نور ځواکونه استولي دي او زیاته کړې یې ده، چې روسیې د ووچانسک سرحدي ښارګوټی پر کنټرول شوو بمونو او توپونو ویشتی دی.

ولسمشر ولادیمیر زیلینسکي په کییف کې خبري غونډې ته وویل: "روسیې په ښارکیف کې د ځوابي بریدونو نوې څپه پیل کړې ده او اوس په دغه سیمه کې سخته جګړه روانه ده."

اوکراین په دغه سیمه کې د روسیې د تیاري په اړه خبرداری ورکړی او ویلي و، چې ښايي د برید لپاره د چمتووالي نښه وي. دا لا څرګنده نه ده چې مسکو به په دغو سیمو کې خپل بریدونه لا ډیر کړي که نه.

زیلینسکي ویلي، چې روسیه ممکن په پسرلي یا دوبي کې د لوی برید لپاره چمتووالی ونیسي.

هغه خبریالانو ته وویل، چې د کییف ځواکونه د جمعې د ورځې برید ته چمتو وو، خو کیدای شي چې مسکو دغې سیمې ته نور ځواکونه واستوي.

د اوکراین د دفاع وزارت په یوه اعلامیه کې ویلي: "د سهار په شاوخوا پنځو بجو، دښمن هڅه وکړه چې د زغرګاډو پر مټ زمونږ دفاعي کرښه ماته کړي. تر اوسه، دا بریدونه په شا تمبول شوي دي؛ په سیمه کې سخته جګړه روانه ده."

د اوکراین یوې جګپوړې پوځي سرچینې له نوم پرته وویل، چې روسي ځواکونو ووچانسک ته نژدې له سرحدي پولې اوکراین ته کیلومتر ور ننوتلي دي.

د سرچینې په خبره، د روسي ځواکونو موخه دا ده چې اوکرایني ځواکونه ۱۰ کیلومتره په شا وتمبوي، خو د اوکراین پوځیان هڅه کوي چې مخه یې ونیسي.