د بشري حقونو سازمان فرانټ لاین د یوې اعلامیې په خپرولو سره ویلي، چې طالبانو د زده کړو د حقونو فعال احمد فهیم عظیمي د طالبانو له خوا په یو کال بند محکوم شوی دی.
فهیم عظیمي په ۱۴۰۲ کال کې د طالبانو د استخباراتو له خوا د کابل په کارته چهار سیمه کې ونیول شو او د پلچرخي زندان ته ولیږدول شو.
د بشري حقونو سازمان فرانټ لاین د سې شنبې په ورځ (د غویي ۱۸مه) وویل چې د بشري حقونو دغه فعاله په افغانستان کې د ښځو او نجونو د تعلیم له حق څخه د دفاع په خاطر په کابل کې د طالبانو د محکمې له خوا په بند محکوم شوی دی.
د دغه بنسټ د خبرپاڼې له مخې، طالبانو د دوشنبې په ورځ (د وري ۱۳مه) احمد فهیم عظیمي ته د یوه کال بند سزا اورولې ده.
فرانټ لاین لیکلي چې د بشري حقونو دغه فعال او د هغه کورنۍ د محکمې د حکم پر مهال حاضر نه وو.
د بشري حقونو دغه سازمان د ښاغلي عظيمي او د هغه د کورنۍ د امنيتي وضعيت په اړه د اندېښنې په څرګندولو سره د زده کړې د دغه فعال د ژر تر ژره خوشې کېدو او د هغه د کورنۍ د ملاتړ غوښتنه کړې ده.
د دغه سازمان په اعلاميه کې د عظيمي د کورنۍ د ځينو غړو وضعيت "جدي" بلل شوى او ويل شوي، چې پلار يې د روانې مياشتې په لومړۍ نېټه مغزي سکته کړې او روغتيايي حالت يې د اندېښنې وړ دى.
فرانټ لاین د زده کړو د حقونو د دغه فعال نیول کېدل، له هغه سره د طالبانو چلند او د ښاغلي عظیمي نا عادلانه محاکمه غندلې ده.
په اعلامیه کې راغلي: "طالبانو د زده کړو د حقونو د دغه فعال پاسپورټ او وسايل چې په کې د هغه لپ ټاپ، فلش میموري، تعليمي اسناد او ځینې نور اسناد ضبط کړي دي.
په تېرو درېیو کلونو کې طالبانو د بشري حقونو لسګونه فعالان، ښځې، خبریالان او نور کسان په بېلابېلو پلمو نیولي او شکنجه کړي دي.
