د طالبانو د لوړو زده کړو سرپرست وزیر د ملا هبت الله له قوله وایي، چې علم باید د کیفیت پر معیار برابر شي. ندا محمد ندیم د ننګرهار پوهنتون زده کړیالانو ته په وینا کې دغه راز زیاته کړه، چې که خلک یوازې په نوم فارغ شي لکه ماشیني چرګان به له حسابه تېر وي او خدمت به هم نه شي کولی.
د نوموړي په خبره؛ د دغې ډلې مشرتابه نه غواړي چې د ظرفیت له پلوه کمزوري کسان په دندو وګومارل شي.
ښاغلی ندیم همداراز وایي، چې دیني او عصري علوم دواړه د پرمختګ وسیلې دي.
د طالبانو د لوړو زده کړو سرپرست وزیر دغه خبرې په داسې حال کې کوي، چې دا ډله خپله د زده کړو په برخو کې کیفیت او ظرفیتونه په پام کې نه نیسي.
یادې ډلې د تېر کال په وروستیو کې د کابل په ګډون د هېواد په اووه زونونو کې له ۵۱ زره ملایانو څخه چې د زده کړو کچه یې روښانه نه وه، د ماسټرۍ اسنادو یا عالمیه مرحلې د ارزولو لپاره ازموینه واخیسته.
له دې سره، په تېرو درېیو کلونو کې طالبانو د افغانستان په بېلابېلو ولایتونو کې سلګونه جوماتونه او دیني مدرسې جوړې کړې دي او د عصري زده کړو په پرتله پر دیني زده کړو ډېر ټينګار کوي.
پر دې سربېره د طالبانو د پوهنې وزارت د انستیتیوتونو او ښوونځیو په ګډون ډېر ښوونیز مرکزونه په جهادي مدرسو هم بدل کړي دي.
پر افغانستان د طالبانو له واکمنۍ او د دغې ډلې له سخت دریځیو وروسته د هېواد زرګونو ځوانانو او کدرونو هېواد پرېښود.
د راپورونو له مخې، یوازې په کابل پوهنتون کې چې د تېر حکومت پر مهال شاوخوا ۸۰۰ استادان وو، ددغې ډلې له واکمنۍ وروسته د دغو استادانو له نیمايي ډېر یې له هېواده وتلي دي.
