په پروان کې د طالبانو د کانونو او پټرولیم مشر عبدالقدوس نعماني وايي؛ په کوه صافي ولسوالۍ کې د کرومایټ ډبرو کان کیندنه پیل شوه. طالبانو د دغه کان د کېدنې چارې یو خصوصي شرکت ته سپارلې دي.
د طالبانو تر واک لاندې باختر خبري اژانس د دغې ډلې د مسوولانو له قوله راپور ورکړی، چې په پروان ولایت کې د کرومایټ ډبرو کان د سپړنې چارې یې یوه خصوصي شرکت ته سپارلې چې کار پرې پیل شوي.
کرومایټ ډبرې د کروم یوازینۍ سرچینه ده او د فولادو په صنعت کې کارول کیږي.
پر افغانستان د طالبانو له واکمن کېدو ورسته د دغه ډلې له لوري د کانونو د سپړنې چارې خصوصي شرکتونو ته سپارل کیږي.
د ځینو سرچینو د معلوماتو له مخې د تېر جمهوري حکومت پرمهال د افغانستان د یو شمیر ولایتونو څخه کرومایټ ډبرې پاکستان ته قاچاق کېدلې.
