د ایران د بهرنیو چارو مرستیال وزیر په افغانستان کې د ملګرو ملتونو له استازې سره په کتنه کې افغانستان ته له بهر څخه د لوستو افغانانو د راستنېدو غوښتنه وکړه. علي باقري همداراز وویل چې د نړیوالو سازمانونو لومړیتوب د افغانانو د امنیت او هوساینې راوستل دي.
د ایرنا خبري اژانس د راپور له مخې علي باقري د یکشنبې په ورځ له روزا اوتنبایوا سره په دوحه کې د راتلونکې غونډې په اړه خبرې اترې وکړې.
ښاغلي باقري وویل، په افغانستان کې د نړیوالو سازمانونو کړنلاره باید د خلکو ګټو ته لومړیتوب ورکړي او د افغانستان د امنیت، د دغه هېواد د پرمختګ او د افغانستان د خلکو د ژوند د ښه والي او هوساینې لامل شي.
د ایران د بهرنیو چارو وزارت سیاسي مرستیال همداراز په افغانستان کې د سولې او ټيکاؤ راوستلو په بهیر کې د ملګرو ملتونو د رغنده رول په ادا کولو او همداشان په افغانستان کې د ګاونډیو هېوادونو په اغېزمن رول او وړتیا ټينګار وکړ.
د ایرنا د خبر له مخې، په دغه کتنه کې روزا اوتنبایوا د افغانستان له پرمختګ او ثبات سره د مرستې لپاره د سیمې او نړۍ د هیوادونو د دریځونو د همغږۍ په اړتیاټینګار وکړ.
ایرنا خبرياژانس لیکلی: «د ملګرو ملتونو استازې له یوې خوا د دواړو هیوادونو تر منځ د رغنده ملګرتیا د رامنځته کولو او پراختیا او له بلې خوا د افغانستان له سرپرست حکومت سره د ایران د جوړجاړي غوښتنه وکړه.»
