د طالبانو د حج او اوقافو وزارت وايي؛ چې د دغې ډلې د حج او اوقافو وزیر نورمحمد ثاقب نن په استانبول کې د اسلامي نړۍ هېوادونو د عالمانو مشورتي غونډې په څنډه کې د ترکیې له ولسمشر رجب طیب اردوغان سره وکتل. ترکیې تر اوسه پورې د دې لیدنې په اړه څه نه دي ویلي.
د طالبانو د ارشاد، حج او اوقافو وزارت د دوشنبې په ورځ د (غوايي ۲۴مه) په اېکس پاڼه لیکي، چې د طالبانو د کابینې دغه چارواکي له اردوغان سره د یوې غونډې پر مهال په لیدنه کې ویلي چې طالبان «له ترکیې سره ښې اړیکې غواړي».
یاد وزارت د نور محمد ثاقب او رجب طیب اردوغان کوم ګډ عکس نه دی خپور کړی.
د اسلامي نړۍ د عالمانو مشورتي غونډه د ترکیې په نوښت د غوايي په ۲۳مه د یکشنبې په ورځ د ترکیې په استانبول ښار کې پیل شوه.
د طالبانو د ارشاد حج او اوقافو وزیر نور محمد ثاقب هم په دغه ناسته کې ګډون کړی.
پر افغانستان د طالبانو له واکمنېدو وروسته ترکیې د افغانستان ټول ډیپلوماټیک دفترونه طالبانو ته وسپارل.
دا په داسې حال کې ده چې دغه هېواد د مارشال عبدالرشید دوستم، محمد محقق، عبدالرب رسول سیاف او نورو طالب ضد کسانو کوربه هم دی.
