د سلواکیا لومړی وزیر په برید کې زخمي او روغتون ته ولېږدول شو
د سلواکیا لومړی وزیر رابرټ فیکو نن له یوې حکومتي غونډې وروسته په ډزو وویشتل شو. د راپورونو له مخې په دې پېښه کې د لاس لرلو په تور یو کس هم نیول شوی دی.
د سلواکیا لومړی وزیر رابرټ فیکو نن له یوې حکومتي غونډې وروسته په ډزو وویشتل شو. د راپورونو له مخې په دې پېښه کې د لاس لرلو په تور یو کس هم نیول شوی دی.
د سلواکیا رسنیو راپور ورکړی، چې رابرټ فیکو له ډزو وروسته روغتون ته وړل شوی دی.
یوه عیني شاهد رویټرز ته وویل، چې د څو ډزو له اورېدو وروسته یې ولیدل چې یو سړی د پولیسو له خوا نیول شوی او پر ځمکه پړمخ پروت دی.
د سلواکیا د پارلمان مرستیال لوبوس بلاها هم دغه پیښه تایید کړې ده.
ځینو رسنیو لیکلي، چې د سلواکیا ۵۹ کلن لومړی وزیر په معده کې په ډزو لګېدلی او ټپي شوی دی.
د رسنیو د راپورونو له مخې د سلواکیا لومړی وزیر د دغه هېواد په پلازمېنه براتیسلاوا کې یوه روغتون ته لېږدول شوی دی.
تر اوسه د نوموړي د روغتیايي وضعیت په اړه کره معلومات نه شته.
د سلواکیا لومړی وزیر رابرټ فیکو له روسیې سره په جګړه کې د اوکراین د لویدیځ د ملاتړ له مخالفانو څخه دی.
