تاجکستان د څادرۍ په اغوستلو بندیز ولګاوه

تاجک میرمنې اوس هم هغه ټېکري یا پړوني په سر کولی شي چې خپل مخ، ویښتان او غاړه یې پوره پټه نه کړي.

د تاجکستان اسيا پلاس خبري اژانس ته درې ورځې مخکې د تاجکستان د ديني چارو د کمېټې مشر سليمان دولت زاده ویلي و چې د هېواد په «دودونو او د ادابو ترتیب» د وخت له غوښتنو سره سم دی.

سلیمان دولت زاده ویلي:«له ملي کولتور سره ټکر کې د بهرنیو جامو واردول، پلورل، ترویج او همدارنګه په عامه ځایونو کې د دې جامو اغوستل منع دي.»

خو دا یې نه ده څرګنده کړې چې څه ډول جامې «پردۍ» دي.

فرغانه خبري اژانس هم د خپلو ځایي سرچینو په حواله راپور ورکړی چې که ښځې د «تاجکي سبک» حجاب و انه غونځي، عامه ځایونو ته د ننوتلو اجازه نه لري.

فرغانه خبري اژانس د تاجکستان د پلټونکو له قوله لیکلي: «هغه جامې چې مخ بشپړ پټوي «له ملي کولتور پردۍ » پدیده ده.

د فرغانې د راپور له مخې، هغه ښځې چې له دغه قانون سرغړونه وکړي، درې زره او ۵۰۰ ساماني یا ۳۲۲ډالره جریمه کېږي.

په ورته وخت کې په ټولنیزو شبکو کې یوه ویډیو خپره شوې چې ښيي امنیتي ځواکونه تاجکې ودروي او ورته وایي چې له تاجک کولتور سره سم دې خپل ټېکري په سر کړي.

په دې ویډیو کې تاجکستاني افسرانې ښځو ته وايي چې خپل ټېکري د تاجکستان له کولتور سره سم پر سر کړي.